«Kia Qazaqstan» avtomobıl zaýyty iske qosyldy

Memleket basshysy osydan eki jyl buryn Qostanaıǵa sapary kezinde «Kia Sportage» avtokóliginiń óndirisi iske qosylǵanyn eske saldy. Endi mine «Kia Motors» korporasııasymen jasalǵan kelisimge sáıkes zaýyt ashyldy.

Qasym-Jomart Toqaev «Kia Corporation» prezıdenti Ho-sýng Songqa jáne kompanııaǵa shynaıy rızashylyǵyn bildirip, aýqymdy jumys atqarylǵanyn, nátıjesinde ózara tıimdi jáne jemisti baılanys nyǵaıa túskenin atap ótti.

– Jalpy, búgingi aıtýly oqıǵa Qazaqstan men Koreıa arasyndaǵy strategııalyq serik­testik pen tabysty qarym-qatynastyń jarqyn kóri­nisi ekeni anyq. Koreıa Res­pýb­lıkasy – Qazaqstannyń Azııadaǵy senimdi áriptesi. Biz yntymaqtastyǵymyzdy kúsheıte túsýge múddelimiz. Qazir Qazaqstanda Koreıanyń 800-den asa kompanııasy tabys­ty jumys istep jatyr. Sonyń ishinde avtokólik jasaý salasyn ózara tıimdi yqpaldastyq kózi dep aıtýǵa tolyq negiz bar. Búgin ashylyp jatqan biregeı zaýyt – sonyń aıqyn dáleli. «Kia» korporasııasy avtomobıl shyǵaratyn álemdegi 10 iri kompanııanyń qataryna kiredi. Sondaı-aq «Kia» – Qazaqstan azamattary eń kóp satyp alatyn úsh kólik markasynyń biri. «Kia» brendiniń ataýy «kóterilip kele jatqan» jáne «Azııa» degen eki ıeroglıften quralýynyń sımvoldyq máni bar. Shyn máninde, kompanııa Azııanyń jańa ekonomıkalyq órleýi men gúldenýiniń jarqyn kórinisi­ne aınaldy. «Kia» – keleshek­tiń korporasııasy. Kásiporyn shyǵaratyn avtokólikterde ozyq tehnologııa, tartymdy dızaın jáne joǵary deńgeıdegi senimdilik úılesim tapqan, – dedi Prezıdent.

Qasym-Jomart Toqaev «Kia» kompanııasy áleýmettik jaýapkershilik aıasynda adam kapıtalyn damytýǵa belsendi túrde ınvestısııa salyp kele jatqanyna toqtaldy.

– Álemdik avtoalpaýyt elimiz­degi zaýytty iske qospaı turyp, Qazaqstan jáne Koreıa ýnıver­sıtetterimen, kolledjderimen uzaqmerzimdi yntymaqtastyqty jolǵa qoıa bastady. Budan bólek, bilikti kadrlardy daıarlaý úshin kompanııa korporatıvtik oqý ortalyǵyn ashýdy josparlap otyr. «Kia» osy arqyly qyzmet­kerlerge qamqorlyq – uıym mádenıetiniń mańyzdy bólshegi ekenin kórsetedi. Bul shynaıy qurmet pen nıettestik ortasyn qalyp­tastyrady. Jumysshy maman­darǵa dál osyndaı qarym-qaty­nas qoǵamda eńbekqorlyq pen áleý­mettik ádildik qun­dy­lyq­tary­nyń ornyǵýyna septigin tıgizedi. Zaýytta óndiris lokalızasııa­syna ekpin qoıy­lyp otyr. Bul shy­ǵarylatyn ónim­degi qazaqstandyq úlesti edáýir arttyrýǵa múmkin­dik beredi. Sarapshylardyń esebinshe, avtozaýyttaǵy árbir jumys orny logıstıka, servıs, ınfra­qury­lym salalarynda janama túrde bes-alty adamdy jumys­pen qamtýǵa yqpal etedi. Bul – jaı ǵana óndiris jelisiniń keńeıýi emes, tolyq ónerkásip klas­terin qalyptastyrý úshin jasal­ǵan zor qadam. Mundaı júıe­de shaǵyn jáne orta bıznes turaqty damýǵa múmkindik alady. О́ndiristi uıymdastyrýdyń osyndaı keshendi tásili Qostanaı obly­sy­nyń ǵana emes, tutas eli­miz­­diń ındýstrııalyq áleýe­tin kú­sheıtedi. «Kia» zaýyty qazaq­stan­dyq avtoónerkásiptiń órken­deýine tyń serpin beretinine senim­dimin. Jańa kásiporynnyń jumy­sy otandyq avtoparktiń jańa­rýyna septigin tıgizedi. Ol qala­lar men kúre joldardaǵy jol qoz­ǵalysy qaýipsizdigine oń áser etedi, – dedi Memleket basshysy.

Prezıdent memlekettiń mashına jasaý salasyna basa mán beretinin jetkizdi.

– Byltyr osy salaǵa 290 mlrd teńge­den asa ınvestısııa tar­tyl­dy. Bul – aldyńǵy jylmen sa­lys­­t­yrǵanda eki jarym ese kóp. Osy úrdis bıyl da jal­ǵasý­da. Jyl basynan beri osy salaǵa 178 mlrd teńge qarajat salyn­dy. Investorlar Qazaq­stan­ǵa zor qyzy­ǵý­shylyq tanytyp otyr. Aýqymdy shara­lar­dyń nátıjesinde bul baǵyt­ta bir­qatar tabysqa qol jetkiz­dik. О́­tken jyly elimizde 145 myń­nan asa kólik shyǵaryldy. Astana, Almaty, Semeı, Oral, Kókshe­taý, Qostanaı jáne Saran qalalaryn­da avtokólik óndirisine qatysty kásiporyndar jumys istep tur. 10 myńnan asa azamatymyz osy salada eńbek etedi. Onyń jar­tysy­na jýyǵy – jastar. Al Qosta­naı­daǵy zaýytta 1,5 myń adam ju­mys isteıtin bolady. Jumysshylar jańa daǵdylar­dy ıgerip, bilikti maman retinde qalyptasady. Aldaǵy ýaqytta kásiporyn ınjenerlerdiń naǵyz sheberhanasy bolady dep senemin, – dedi Qasym-Jomart Toqaev.

Prezıdent jaqynda Úkimet­ke ekonomıkalyq ahýaldy turaqtan­dyrý úshin naqty sharalar ázirleý týraly tapsyrma berilip, osyǵan baılanysty birqatar mańyzdy sheshim qabyldanǵanyn aıtty.

– Soǵan sáıkes endi azamat­tar­ǵa avtokólikti lızıng­pen alý múmkindigi usyny­lady. Sonyń arqa­synda avtokó­likter halyqqa meı­linshe qoljetimdi bola túspek. Elimizde «Kia Qazaqstan» zaýyty­nyń iske qosylýy osy salany teh­nologııa­lyq turǵydan jańǵyr­týǵa zor serpin bereri sózsiz. Kásip­oryn bolashaqta basqa da jańa kólik túrlerin shyǵara­dy dep senemin. Osylaısha, álem­dik ozyq talaptarǵa saı kólik­terimizdi syrtqy naryqqa, ıaǵnı shetelge shyǵarýǵa múmkindik bolmaq. Qazaqstan jahandyq avtokólik ónerkásibiniń damýyna bar kúsh-jigerin salýǵa daıyn, – dedi Prezıdent.

Memleket basshysy Qasym-Jomart Toqaev «Kia Corporation» prezıdenti Ho-sýng Songty II dárejeli «Dostyq» ordenimen marapattady.

– Biz cizdiń qazaq-koreı yntymaqtastyǵynyń damýyna, qos halyqtyń arasyndaǵy dostyqtyń nyǵaıýyna qosqan úlesińizdi joǵary baǵalaı­myz. Shyn máninde, elimi­z­diń avtokólik salasyn damytýǵa sińirgen eń­begińiz mol, – dedi Prezıdent.

«Kia Qazaqstan» zaýytyn salý týraly sheshim 2023 jyly qabyl­dandy. Kásiporyn Qostanaı qalasynyń ındýstrııalyq aıma­ǵyndaǵy 62,95 gektar aýmaqta ornalasqan. Zaýyt jylyna 70 myń kólik óndire alady. In­ves­tısııa kólemi – 131,5 mlrd teńge. Kásiporynda 1 500 jumys orny ashylǵan. Al onyń ónimi Qazaqstanǵa, Ortalyq Azııa jáne EAEO elderiniń naryqtaryna shyǵarylady.