Kógildir otyn ótimdi bolyp tur

Keshe Ortalyq kommýnıkasııalar qyzmetinde Energetıka vıse-mınıstri Maǵzum Myrzaǵalıev pen «KAZENERGY» qaýym­dastyǵynyń bas dırektory Áset Maǵaýov baspasóz más­lıhatyn ótkizdi. Onda elimizdi gazben qamtý sharalary sóz boldy. Vıse-mınıstr áýeli Memleket basshysynyń bergen tapsyrmalary men «Nurly Jol» Joldaýynda jáne ındýstrııalandyrý baǵdarlamasy boıynsha oryndalyp jatqan jumystar jóninde áńgimelep, eldi gazdandyrý máselesine toqtaldy. Buıyrtsa, 2015-2030 jyldarǵa arnalǵan bas syzba boıynsha 2030 jylǵa deıin 13 oblystyń halqy kógildir otynmen tolyq qamtylady eken. «Byltyr respýblıkada tabıǵı gazdy tutyný kólemi 12,4 mlrd. tekshe metrge jetti. Esterińizde bolsa, ótken jyldyń qarashasynda Úkimet eldi gazdandyrýdyń 2015-2030 jyldarǵa arnalǵan bas syzbasyn bekitken bolatyn. Osy syzbany júzege asyrý arqyly 2030 jylǵa deıin 13 oblys gazben qamtylady. Qazir elimizdiń 42 paıyzy gazben qamtylyp otyr. Al, bas syzba aıasynda turǵyndardyń 56 paıyzy kógildir otynǵa qol jetkizedi. Jalpy, jańa gaz qubyrlarynyń uzyndyǵy 29 myń shaqyrymǵa jetedi», dedi ol. Buǵan deıin munaı óndirýge basymdyq berip, gaz eksportyna asa kóńil bólmegen elimiz endigide bul sharýany da myqtap qolǵa ala bastapty. Sebebi, álem elderiniń gazǵa degen suranysy jyldam artyp keledi eken. Osyǵan oraı elimiz ótken jyldyń ózinde gaz eksportyn 6 mlrd. tekshe metrge jetkizipti. «Kaspıı qaırańynda ashylǵan ken oryndaryn qosa alǵanda, elimizdiń geologııalyq resýrstary gaz boıynsha 6-7 trln. tekshe metrden asady. Shyǵarylatyn qor 3,9 trln. tekshe metr. Al byltyr 43,2 mlrd. tekshe metrdi qurady, sońǵy tórt jylmen salystyrǵanda, bul eki esege artyq kórsetkish. Osylaısha, elimizde gaz óndirý kólemi artyp kele jatyr. Búginde «Qarashyǵanaq Petroleým Opereıtıng», «Teńizshevroıl», «SNPS-AqtóbeMunaıGaz», «Jaıyq­Munaı» syndy kompanııalar elimizdegi negizgi gaz óndirýshiler», dep atap ótti M.Myrzaǵalıev. Elimizde budan bylaı gaz quıý stansalarynyń sany artatyn bolady. «Mınıstrlik pen «QazMunaıGaz – óńdeý jáne marketıng» kompanııasy jáne «Gelıos» janar-jaǵarmaı quıý stansasy jelisi arasynda gazdy avtokólikterge otyn retinde paıdalanýdy kópshilikke taratý jónindegi yntymaqtastyq týraly memorandým bekitildi. О́kinishtisi, ázirshe osy otyn túri kólikterde keńinen tutynylmaı otyr. Munyń negizgi sebebi damymaǵan ınfraqurylymǵa, onyń ishinde, otyn quıý stansalarynyń jetkiliksizdigine baılanysty. Naqty sanǵa júginsek, búginde avtogaz quıý beketteriniń sany elimiz boıynsha 500-den astam ǵana jáne onyń kólemi jetkiliksiz. Endi osy kemdiktiń ornyn toltyrsaq degen jospar bar. Buǵan qosa, álemdik baǵanyń tómendeýi nátıjesinde suıytylǵan gazdyń shekti kóterme baǵasyn bekittik. Endi otynnyń osy túri avtokólikpen júretinder úshin qoljetimdi bola tústi», dedi spıker. Nurbaı ELMURATOV, «Egemen Qazaqstan».