«Ýaqyt jebesi» atty bestomdyq el ómiriniń sońǵy otyz jyldaǵy mańyzdy tustaryn qamtıdy. Onyń alǵashqy tomy memlekettegi qoǵamdyq-saıası ózgeristerdi eksheýge, saıası baǵa berýge baǵyttalsa, «Tuǵyry bıik tulǵalar» dep atalǵan ekinshi tomdyqqa avtordyń baspasóz betterinde ult tarıhynan oıyp oryn alatyn tarıhı tulǵalarmen órbigen suhbattary men maqalalary engen. «Alapat soǵys aqıqaty» dep atalǵan úshinshi kitap surapyl soǵys kezeńiniń qazaq oqyrmanyna buryn beımálim, qupııa tustaryn ashyp, qaısar jaýyngerlerdiń erligi men ómir órneginen syr shertedi. Al, «Dıalogtar dúbiri», «Otbasylyq órnek» dep atalǵan kelesi kitaptardyń da oqyrmanǵa bereri mol.
Jyly júzdesýde kesh qonaǵy kórermender suraǵyna jaýap berip, táýelsizdiktiń qadir qasıeti, Egemendik deklarasııasy qabyldanǵan tustaǵy tarıhı oqıǵalar týraly baıandap, ult muraty, urpaq tárbıesine qatysty oramdy oılaryn ortaǵa saldy.
Búginde keń qoldanysqa engen «Aqorda», «Eltańba» (gerb), «Ánuran» (gımn), «Elorda» (stolısa), «Doǵarys» (otstavka), «Kádesyı» (sývenır), «Pikirterim» (opros), «Oqtumsyq» (boegolovka), «Tosynsyı» (sıýrprız), «Nópir shaq» (chas pık), «Aılabuıym» (prısposoblenıe), «Zańastar qujattar» (podzakonnye akty) t.b. ondaǵan sózder men tirkesterdiń avtory Marat Baıdildáuly ulttyq baspasóz ben televızııada jetekshi qyzmetter atqaryp, ult rýhanııaty men mádenıetimizdiń damýyna súbeli úles qosyp keledi.
Is-sharany júrgizgen «Ortalyqtandyrylǵan kitaphana júıesine» qarasty №31 kitaphananyń meńgerýshisi Gúlmıra Baǵytqyzy, mundaı taǵylymdy tulǵalarmen júzdesý jastardyń boıyna jiger berip, olardyń boıyndaǵy memleketshildik rýhyn asqaqtatýǵa serpin beretinin atap ótti.
«Marat Baıdildáulynyń ulttyq-demokratııalyq kózqarastary, ásirese, kórnekti qalamger Aqseleý Seıdimbek basqarǵan «Bilim jáne eńbek» jýrnalynda qyzmet istegen 1982 - 1989 jyldary qalyptasty. Zııaly qaýymnyń azattyqty ańsaǵan Murat Áýezov, Sábetqazy Aqataev, Maqash Tátimov, Marat Senbın sııaqty alǵyr oıly ókilderimen tanysý, pikirlesý onyń ult azattyǵy, qazaq halqynyń ózin ózi bıleýi, ulttyq demokratııalyq ózgerister jónindegi oı-tujyrymdaryn nyǵaıta tústi. Álkeı Marǵulan, Nurtas Ońdasynov, Orynbek Jáýtikov, Rahmanqul Berdibaev, Mardan Báıdildaev, Jaǵda Babalyq sııaqty ǵulama ǵalymdarmen kezdesý ulttyq qundylyqtarǵa degen qurmetin tereńdetti. Jasy 75-ke kelse de ult rýhanııatyna qaltqysyz qyzmet etip kele jatqan qalamger kesh qonaqtarynyń kókeıinde júrgen mańyzdy saýaldarǵa jaýap berip, kórermenge jiger syılady»,- deıdi Gúlmıra Baǵytqyzy.
Áserli keshte Qurmanǵazy atyndaǵy Qazaq ulttyq konservatorııasy vokoldyq óneri kafedrasynyń professory Saýle Nurǵalıova, Kemel yqsham aýdanyndaǵy «Belsendi ómir súrý» ortalyǵynyń múshelerinen quralǵan «Beý, aıdaı» ájeler ansambli óner kórsetti. Jınalǵandar sondaı-aq, Marat Baıdildáulynyń shyǵarmashylyǵy men ómir jolynan syr shertetin fotosýretter kórmesin tamashalady.
