Forýmǵa Birikken Ulttar Uıymy, Halyqaralyq eńbek uıymy, Halyqaralyq kóshi-qon uıymy, IýNISEF, Dúnıejúzilik bank jáne basqa da halyqaralyq uıymdardyń ókilderi qatysty. Memleket basshysy qoǵam damýynyń mańyzdy býyny retinde áleýmettik qyzmetkerler mártebesin kóterýge jáne áleýmettik qorǵaý júıesin reformalaýǵa úlken kóńil bólip jatyr. Premer-mınıstr Oljas Bektenov óz sózinde Qazaqstanda áleýmettik qorǵaýdyń tıimdi júıesin qurý boıynsha júrgizilip jatqan jumystarǵa toqtalyp, áleýmettik qorǵaý salasy qyzmetkerleriniń ardagerler men qoǵamdyq uıymdar ókilderiniń, azamattardyń osal toptaryn qoldaýdy qamtamasyz etýge qosqan úlesin atap ótti.
«Qazaqstan Respýblıkasynyń Prezıdenti Qasym-Jomart Toqaev bıylǵy halyqqa Joldaýynda memleket ár azamattyń laıyqty tabys taýyp, sapaly áleýmettik qyzmet alyp, erteńgi kúnine senimdi bolýy úshin barynsha jaǵdaı jasaıtynyn atap ótti. Bul oraıda áleýmettik teńsizdikti joıý, arnaýly áleýmettik qyzmetter júıesin damytý jáne osy baǵytta eń úzdik halyqaralyq standarttardy engizý memlekettiń basym mindetteriniń biri bolyp qalyp otyr. Búginde sıfrlandyrý áleýmettik-eńbek qatynastarynyń barlyq salasyna belsendi túrde engizilip, úlken derekterdi óńdeýge múmkindik berip otyr», dedi Oljas Bektenov.2021-2025 jyldar aralyǵynda arnaýly áleýmettik qyzmet kórsetý ortalyqtarynda jumys isteıtin áleýmettik sala qyzmetkerleriniń jalaqysy 2 ese kóbeıgen. Sondaı-aq ákimshilik jáne kómekshi qyzmetkerlerdiń, memlekettik medısınalyq-áleýmettik mekemeler, úıde kútim jasaý jáne ýaqytsha bolý uıymdary qyzmetkerleriniń jalaqysy olardyń qoldanystaǵy qosymsha aqylarynyń mólsherin bazalyq laýazymdyq jalaqynyń 30%-ynan laýazymdyq jalaqynyń 40%-yna deıin ulǵaıtý jolymen kóbeıtildi. Elimizde halyqty áleýmettik qorǵaý salasynda barlyǵy 40 myń maman (medısına qyzmetkerleri, arnaıy pedagogter jáne áleýmettik qyzmetkerler) jumys isteıdi. QR Áleýmettik kodeksinde oryndalatyn jumystardyń kásibı deńgeıi men kúrdeliligin eskere otyryp, oqytý, sertıfıkattaý jáne sanattar berý men eńbekke aqy tóleýdiń jańa júıesin engizý arqyly áleýmettik qyzmetkerlerdiń mártebesin arttyrý kózdelgen.
Halyqaralyq forým barysynda qatysýshylarǵa Qazaqstanda azamattardyń osal sanattaryn qoldaý úshin keńinen qoldanylatyn sıfrlyq sheshimder usynyldy. Onyń ishinde biryńǵaı sıfrlyq platforma, áleýmettik qyzmetter portaly jáne 2024 jyldyń úzdik jobasy dep tanylǵan otbasynyń sıfrlyq kartasy sııaqty ınnovasııalyq jobalar bar. Kartada 6 mln qazaqstandyq otbasy týraly derekter bar, azamattarǵa memlekettik qyzmetterdiń 11 túri proaktıvti formatta usynylady. Áleýmettik qorǵaý júıesin damytý sheńberinde Qazaqstan halyqaralyq uıymdarmen belsendi ózara is-qımyl júrgizip jatyr. Múgedektigi bar jandardyń, halyqtyń áleýmettik osal toptarynyń quqyqtaryn qorǵaýǵa, arnaýly áleýmettik qyzmetter júıesin damytýǵa baǵyttalǵan birqatar birlesken joba júzege asyrylýda. Aldaǵy bes jylǵa arnalǵan ınklıýzıvti saıasat tujyrymdamasy qabyldandy, BUU-nyń Múgedekterdiń quqyqtary týraly konvensııasy ratıfıkasııalandy. Halyqaralyq eńbek uıymymen seriktestikte ulttyq zańnamany jetildirý boıynsha kelisilgen jumystar júrgizilýde.
Forýmda Halyqaralyq áleýmettik qamsyzdandyrý qaýymdastyǵynyń (HÁQQ) prezıdenti doktor Mohammed Azman Qazaqstannyń áleýmettik qyzmetkerlerin kásibı merekelerimen quttyqtady. Forým alańynda Premer-mınıstr birqatar tehnologııalyq sheshimdermen tanysty. Atap aıtqanda, Jambyl oblysynan kelgen otandyq startapshylar jasandy ıntellektige ıntegrasııalanǵan sıfrlyq tehnologııalar kómegimen til jáne bas qımyldary arqyly múgedekter arbasyn basqarý ádisin tanystyrdy.
