Foto: pinterest.com
Úmitkerdiń Jambyl oblysynda sońǵy úsh jylda tirkeýi bolýymen qatar jasy 35-ten aspaýy kerek. Sondaı-aq, baǵdarlamaǵa qatysýshy men onyń otbasy músheleriniń sońǵy 5 jyl ishinde jyljymaıtyn múlki bolmaýy kerek. Taraz qalasynyń turǵyny Qaırat Tursynbaev atalǵan baǵdarlama arqyly 2024 jyly baspanaly bolǵan. Ol bir jyl buryn baǵyn synap baǵdarlamaǵa qatysqanyna qýanyshty.
«Halyqqa qyzmet kórsetý ortalyǵynda jumys istedim de baǵdarlama bastaldy degen habarlandyrýdy kórdim. Birden qujattarymdy ótkizdim. 15 mln teńgege Tarazdan 2 bólmeli úı alyp, qýanyshym qoınyma syımady. Otbasy bankiniń jastarǵa kóńil bólip, baǵdarlama shyǵarǵandaryna alǵys aıtamyn. Jastar, qapy qalmaı qatysyp, baqtaryńdy synańdar», deıdi Qaırat Tursynbaev.
Bıyl «Áýlıeata jastary» baǵdarlamasy qoljetimdi sharttarmen turǵyn úı alýdyń taǵy bir qosymsha quralyna aınalady. 2022 jyly bastalǵan baǵdarlama arqyly osy ýaqytqa deıin 325 otbasy qonys toıyn toılady.
«Osy baǵdarlama arqyly 35-jasqa deıingi azamattardy baspanamen qamtý júrgizilýde. Bıyl Áýlıeata jastaryna 1 mlrd 250 mln teńge bólindi. Ákimdik tarapynan 1 mlrd qoldaý bolsa 250 mlndy Otbasy banki berip otyr. Osy joly jospar boıynsha 80-nen astam Otbasy baspanaly bolady», deıdi «Otbasy bank» Jambyl oblystyq fılıalynyń dırektory Nurlan Sultanov.
Aıta keteıik, jańa turǵyn úı baǵdarlamasyna qatysý týraly ótinimderdi qabyldaý www.e-jambyl.kz portalynda qazan aıynyń 28-nen, qarasha aıynyń 6-syna deıin júzege asady. О́tinim berý úshin ESQ (elektrondy sıfrly qoltańba) qajet.
Al turǵyn úı satyp alýǵa Otbasy bank 15 mln teńgege deıin qaryz beredi (eger múliktiń quny odan asatyn bolsa, satyp alýshy aıyrmashylyqty óz qarajaty esebinen tóleı alady). Qatysýshylardy irikteý úshin qujattardy baǵalaý jumysy júrgiziledi. Bastapqy jarna – 10%, nesıe boıynsha syıaqy mólsherlemesi – jyldyq 10% (JTSM 5,2%), nesıeniń tólem merzimi – 19 jylǵa deıin.
