Foto: Ashyq derekkóz
Bas prokýratýranyń dereginshe, ótken jyly 53 320 kásipker tekserýden ótken. Bul kórsetkish moratorıı engizilgenge deıingi 2019 jylmen salystyrǵanda 42,1%-ǵa tómen.
2025 jyly da mundaı úrdis saqtalyp otyr. Bıylǵy alty aıdyń ishinde tekserýlerdiń sany taǵy 1,9%-ǵa qysqaryp, 46 375-ke jetken. Bul 2019 jyldyń birinshi jartysyndaǵy deńgeıden 73,8%-ǵa az.
Sonymen qatar, bızneske qoıylatyn 10 myńnan astam artyq talaptar joıyldy. «1 in 2 out» qaǵıdaty (qoldanystaǵy eki retteý tetigin alyp tastap, jańadan bir talap engizý) retteý júktemesin arttyrmaýǵa múmkindik berdi. Jyl sońyna deıin ruqsat alý rásimderin jeńildetý jáne biliktilik talaptaryn qaıta qaraý josparlanyp otyr.
Sondaı-aq «eGov Business» mobıldi qosymshasy iske qosyldy. Onda «Meniń bıznesim» jeke kabıneti bar, onyń kómegimen 30-dan astam memlekettik qyzmetke ońaı qol jetkizýge múmkindik jasalǵan. Bul qyzmetterge kásiporyndy tirkeý, salyq kúntizbesin baqylaý, sertıfıkat alý jáne sıfrlyq qujattarǵa qol qoıý sııaqty fýnksııalar kiredi.
2024 jyly bıznesti qarjylaı qoldaý sharalarynyń kólemi de artty. Jeńildikpen qarjylandyrý sharalarymen jalpy somasy 1,3 trln teńgeden asatyn 26 myńnan astam joba qamtylǵan.
2025 jyly mıkro jáne shaǵyn kásipkerlikke arnalǵan jańa sýbsıdııalaý mehanızmi engizildi. Sýbsıdııalanatyn kredıt somasy 200 mln teńgeden aspaıdy, syıaqy mólsherlemesi – 12,3%, kredıt berý merzimi – 3 jylǵa deıin. Buǵan qosa, jańa «О́rleý» baǵdarlamasy iske qosyldy. Ol kásipkerlerge 10 jylǵa deıingi merzimge 12,6% mólsherlememen 7 mlrd teńgege deıin nesıe alýǵa múmkindik beredi. Qazirgi ýaqytta osy baǵdarlama boıynsha 392 mlrd teńgege 1 095 jobasy qarjylandaryldy.
Sonymen qatar «Damý» qorynyń bazasynda eki kepildik berý qory quryldy. 1-shi kepildik berý qory sheńberinde quny 281 mlrd teńge bolatyn 1 618 jobaǵa qoldaý kórsetildi, onyń ishinde kepildikter somasy 154,4 mlrd teńgeni qurady. 2-shi kepildik berý qory boıynsha quny 7,1 mlrd teńge bolatyn 1 jobaǵa qoldaý kórsetilse, onyń ishinde kepildikter somasy 2,8 mlrd teńgeni qurady.
Sonymen qatar, 100-den astam qarjylyq jáne qarjylyq emes qoldaý túrin biriktirgen Biryńǵaı ózekti tizilim jasaldy. Onyń oryndalýyna monıtorıng júrgizý úshin «Baqylauda» júıesi engizilip, barlyq prosestiń ashyqtyǵy qamtamasyz etildi.
