Sýret: naryk.kz
О́ńdeý ónerkásibinde mashına jasaý (+14%), hımııa ónerkásibi (+9,6%), qurylys materıaldaryn óndirý (+4,7%), jeńil ónerkásip (+9,4%), rezeńke men plastmassa buıymdaryn shyǵarý (+6,1%), daıyn metall ónimderin óndirý (+15,2%) salalary basym ósim kórsetip otyr.
Qańtar-qyrkúıek aılarynda óńdeý ónerkásibiniń ósimi +6,2% qurady, al on aıdyń qorytyndysy boıynsha ósim shamamen +6,3% deńgeıinde boljandy. Negizgi baıaýlaý metallýrgııa salasynda baıqalady. Onyń úlesi óńdeý ónerkásibiniń shamamen 40%-yn quraıdy. Aıta keteıik, ótken jyly metallýrgııa keıingi on jyldaǵy eń joǵary kórsetkishke – 6,9% ósimge qol jetkizgen bolatyn, bul bıylǵy jylǵa joǵary baza qalyptastyrdy. Shtab otyrysynda baıaýlaýdyń sebepteri jan-jaqty taldanyp, salanyń ósýin jedeldetý sharalary talqylandy.
Qara metallýrgııadaǵy báseńdeý negizinen ferroqorytpa men bolat óndirýdiń azaıýyna baılanysty. Bes ferroqorytpa zaýytynyń tórteýi bıyl elektr energııasy tarıfteriniń kóterilýine baılanysty óndiris kólemin qysqartqan. Ásirese Qaraǵandy oblysyndaǵy kásiporyndarda ónim kólemi azaıǵan, bul óńirdiń jalpy óńirlik óniminde 0,9% úleske ıe. Sondaı-aq saladaǵy birqatar kásiporynda júrgizilgen josparly kúrdeli jóndeý jumystary da óz áserin tıgizdi.
Tústi metallýrgııada ósim qarqynynyń tómendeýi Vasılkov ken ornynda shahtalyq ádiske kóshý men qorlardyń sarqylýymen baılanysty. Serik Jumanǵarın Energetıka mınıstrligine qysqa merzim ishinde qoldanystaǵy qujattarǵa ózgerister engizý múmkindigin pysyqtap, ferroqorytpa zaýyttaryna tómendetilgen tarıf boıynsha elektr energııasyn berýdi qarastyrýdy tapsyrdy.
Toǵyz aıdyń qorytyndysy boıynsha mashına jasaý salasy 14% ósim kórsetti. Salaǵa jańa serpin «Astana Motors Manufacturing Kazakhstan» zaýytynda jeńil avtokólik óndirisiniń iske qosylýy arqyly berilmek. Hımııa ónerkásibi de turaqty ósimin saqtap otyr – 9,6%. Bul ósim ammofos (+55,4%), ammıak selıtrasy (+14,5%), natrıı sıanıdi (+5,4%), polıpropılen (+50,5%), sary fosfor (+12,6%) men kúkirt qyshqyly (+7,3%) óndirisiniń artýy esebinen qamtamasyz etildi.
Bıyl qurylys jumystarynyń eń úlken úlesi kólik ınfraqurylymyna tıesili – 21,3% (joldar men avtomagıstraldar, temirjol jáne metro, kópirler men tonnelder qurylysy). О́nerkásiptik nysandar úlesi – 20,5% (sýmen qamtý, káriz júıeleri men turǵyn úı qurylysy). Gaz qubyrlary, elektr berý jelileri men jylý jelilerin salý jobalary shamamen 5,6%-dy quraıdy. Sala ósiminiń qarqyny joǵary deńgeıde saqtalyp otyr. Al toǵyz aıda +14,9%, on aıdyń qorytyndysy boıynsha +15,2% kútilýde.
Serik Jumanǵarın toǵyz aı qorytyndysy boıynsha qurylys qarqyny tómendegen óńirlerdiń oblys ákimi orynbasarlarynyń baıandamasyn tyńdap, árbir ónerkásip nysany men qurylysty turaqty baqylaýda ustaýdy tapsyrdy. Qıyndyqtar týyndaǵan jaǵdaıda, másele jedel túrde shtabtyń qaraýyna shyǵarylýǵa tıis dedi.
