Jumystar Prezıdent Qasym-Jomart Toqaevtyń sý tasqynyna qarsy qurylystardy nyǵaıtý jónindegi tapsyrmalaryna sáıkes júrgizilip jatyr.
Rekonstrýksııalaý jumysynyń maqsaty – qurylystyń beriktigin nyǵaıtý, eldi mekenniń tolyqqandy qorǵalýyn qamtamasyz etý. Bógetti tolyq rekonstrýksııalaý jobasyna avtojoldardy qalpyna keltirý, temirbeton plıtalaryn tóseý, drenaj júıesi men abattandyrý kiredi. Jobany júzege asyrý myńǵa jýyq halqy bar «Teplıchnoe» aýylyn sý tasqynynan qorǵaýdy qamtamasyz etedi.
Úkimet eldi mekenderdi sý tasqynynan qorǵaý jumystaryn júrgizip otyr. Sý resýrstary jáne ırrıgasııa mınıstrliginiń derekterine súıensek, alty óńirde – Aqmola, Aqtóbe, Batys Qazaqstan, Qostanaı, Pavlodar jáne Soltústik Qazaqstan oblystarynda gıdrotehnıkalyq qurylystardy qalpyna keltirý men salý boıynsha 57 joba, onyń ishinde 13 jańa nysan qurylysy júzege asyrylyp jatyr. Búginde 57 nysannyń 40-y aıaqtaldy, 221 shaqyrym qorǵanys bógetteri salynyp, nyǵaıtyldy, bul jumystyń 91%-yn quraıdy.
Jalpy, «Teplıchnoe» aýylyndaǵy qorǵanys bógeti 1980 jyly paıdalanýǵa berilgen. Bastapqyda bógettiń uzyndyǵy – 380 metr, ortasha eni – 11 metr, ortasha bıiktigi 4 metr bolǵan. 2024 jylǵy sý tasqyny kezinde SQO Qyzyljar aýdanynyń aýmaǵynda jergilikti tabıǵı sıpattaǵy tótenshe jaǵdaı jarııalandy. Esil ózeniniń tasýy saldarynan «Teplıchnoe» aýylyndaǵy qorǵanys bógeti apatty jaǵdaıǵa tap boldy. 2024 jylǵy sý tasqynynan keıingi qalpyna keltirý jumystary kezinde bógettiń uzyndyǵy ulǵaıtyldy.
