«TAV Airports Holding» bas dırektory Serkan Kaptan men Almaty halyqaralyq áýejaıynyń prezıdenti Góker Kóse Horizon kompanııasynyń 2050 jylǵa deıingi strategııalyq damý baǵdarlamasyn júzege asyrý barysy týraly baıandady. Qazir ishki reıster termınalyn rekonstrýksııalaý, muzdan tazartatyn zamanaýı platformasyn qurý, jaqyn mańdaǵy turǵyn úılerdi shýdan oqshaýlaý jáne basqa da jumys júrgizilip jatyr.
Jalpy, tujyrymdamada negizgi jolaqty tolyq rekonstrýksııalaý arqyly úsh ushý-qoný jolaǵynan turatyn júıe qurý, júk perronynyń qurylysy, logıstıkalyq, qoıma keshenderin, jolaýshylarǵa arnalǵan zamanaýı ınfraqurylymdy salý syndy taǵy basqa birqatar jumysty júzege asyrý kózdelgen. Jańǵyrtý jumysy 2050 jylǵa qaraı áýejaıdyń jyl saıynǵy ótkizý qabiletin 55 mln jolaýshy, 500 myń tonna júkke deıin ulǵaıtýǵa múmkindik beredi. Búginde áýe aılaǵy jylyna 12 mln-nan astam jolaýshyǵa qyzmet kórsetip, elimizde avıatasymaldaý kóleminiń 70%-yn qamtamasyz etedi.
«TAV Airports Holding» basshylyǵy búginge deıin 260 mln dollar ınvestısııalanǵanyn habarlady, sondaı-aq jobanyń barlyq kezeńiniń jedel oryndalýy úshin áýejaı paıdasyn odan ári qaıta ınvestısııalaýǵa daıyn ekenin rastady.
Oljas Bektenov Almaty qalasynyń áýejaıy Prezıdent tapsyrmasymen elimizdiń alty qalasynda qurylyp jatqan birtutas ekojúıe tizbegine kiretinin atap ótti. Jańa deńgeıdegi ınfraqurylymdy qurý, áýe aılaǵynyń ótkizý qabiletin arttyrý úshin barlyq jumysty ýaqtyly aıaqtaýdyń mańyzdylyǵyn aıtty.
Nysannyń qoljetimdiligi máselelerin sheshý, azamattarǵa qolaıly bolýyn qamtamasyz etý úshin áýejaı aýmaǵyn aınalyp ótetin, qalalyq avtomagıstraldy, Úlken Almaty aınalma avtojolyn, júk keshenin, áýejaı mańynda aınalma jol salý máseleleri qaraldy. Avıaotyndy jetkizý men saqtaýdyń turaqty jaǵdaıyn qamtamasyz etýge nazar aýdaryldy.
Jıyn qorytyndysynda Premer-mınıstr salalyq mınıstrlikter men Almaty qalasy ákimdigine rekonstrýksııalaý jumysynyń sapaly ári ýaqtyly aıaqtalýyn jiti qadaǵalaýdy tapsyrdy.
