Bes kezeńnen 100-den asa ǵana kandıdat ótken. Olar memlekettik salany damytýǵa qatysty jobalaryn tanystyrdy. Alaıda sońǵy irikteýden tek 50 maman sýyrylyp shyqqan. Jastardyń arasynda bilim magıstrleri, Bolashaq baǵdarlamasynyń stıpendıanttary men memlekettik basqarý akademııasynyń túlekteri bar.
Bıylǵy tórtinshi irikteýdegi basty jańashyldyq memlekettik apparat úshin asa suranysqa ıe salalyq baǵyttar boıynsha rezervti qalyptastyrý boldy. Iаǵnı kandıdattar belgilengen kvotalarǵa sáıkes qabyldandy.
Infografıkany jasaǵan – Záýresh Smaǵul, «EQ»
Osylaısha, «Infraqurylymdy, ónerkásipti damytý jáne saýda saıasaty» baǵyty boıynsha – 8, «Agroónerkásiptik keshen jáne qorshaǵan ortany qorǵaý» baǵyty boıynsha – 9, «Syrtqy saıasat jáne ınvestısııalar» baǵyty boıynsha – 8, «Ekonomıkalyq jáne qarjylyq saıasat» baǵyty boıynsha – 7, «Sıfrlandyrý» baǵyty boıynsha – 9, «Áleýmettik saıasat jáne azamattyq qoǵam» baǵyty boıynsha 9 azamat irikteldi.
Synnan súrinbeı ótken jastar Memlekettik qyzmet isteri agenttiginiń tóraǵasy Darhan Jazyqbaımen kezdesti. Jıynda rezervshilerdiń aldaǵy jospary, múmkindigi, basqarý quzyretin damytýǵa arnalǵan bilim baǵdarlamalaryna qatysý máseleleri talqylandy.
«Prezıdenttik jastar kadrlyq rezervi – Memleket basshysy Qasym-Jomart Toqaevtyń tikeleı bastamasymen júzege asyp jatqan elimizdiń jańa formasııadaǵy bilimdi, jaýapty ári otanshyl jastaryn memlekettik basqarý isine tartýǵa baǵyttalǵan erekshe strategııalyq mańyzǵa ıe bastama. Buǵan deıin rezervke qabyldanǵan 321 jas mamannyń 80%-y túrli sektorda tabysty eńbek etip júr. Onyń ishinde 37-si – saıası laýazymda, beseýi – «A» korpýsynda, 100-i – «B» korpýsynda, tórteýi – depýtat, al 175 adam basqa laýazymdarda qyzmet atqaryp jatyr. Rezervke qabyldaný – birden joǵary laýazymǵa taǵaıyndalý degen sóz emes. Bul – jastarǵa memlekettik qyzmet júıesinde óz áleýetin tolyq kórsetýge, bilimi men biliktilik deńgeıine, kásibı daǵdysyna súıene otyryp ilgerileýge berilgen múmkindik», deıdi D.Jazyqbaı.
Rezerv músheleri basqarýshylyq quzyretti damytýǵa baǵyttalǵan zamanaýı oqytý baǵdarlamalaryna qol jetkize alady. Ári úsh jyl ishinde saıası memlekettik qyzmetterge, «A» korpýsynyń ákimshilik memlekettik laýazymdaryna, sondaı-aq «B» korpýsynyń basshylyǵy qyzmetine taǵaıyndalýy múmkin.
Bıylǵy iriktelgen qatysýshylardyń ortasha jasy – 31. Ortasha eńbek ótili – 9 jyl. Rezervshilerdiń 28 paıyzy áıel bolsa, 72 paıyzy – erler.
Alty kezeńnen oıdaǵydaı ótip, rezervke engenderdiń qatarynda Jasulan Qýandyq bar. Bala kúninen memlekettik qyzmetker bolýdy armandaǵan jas 2019 jyldan beri osy jobaǵa qatysyp, baǵyn synap kelgen. Ár jyldary tehnıkalyq, keıde qujattyń tolyq bolmaýyna baılanysty óte almaǵan. Bıyl baǵy janyp, 50 úzdiktiń qataryna endi.
«Besinshi synyptan bastap ózime «ákim bolamyn» dep maqsat qoıdym. Sol sebepti Ál-Farabı atyndaǵy Qazaq ulttyq ýnıversıtetiniń «Memlekettik jáne jergilikti basqarý» mamandyǵyna grantqa túsip, keıin magıstratýrada «Iskerlik ákimshilendirý» boıynsha bilim aldym. Izinshe doktorantýraǵa Memlekettik jáne jergilikti basqarý mamandyǵyna tapsyrdym. Osy 9 jyl boıy jınaǵan bilimim men tájirıbem memlekettik basqarý salasynda eńbek etýge baǵyttaldy. Endi sol bilimdi naqty iste kórsetý ýaqyty keldi dep oılaımyn. Ár kezeń óz aldyna kúrdeli boldy. Keı sátterde «osy joly óte almaı qalam ba?» degen oılar da mazalady. Biraq osy ýaqytqa deıin túrli salada jınaǵan tájirıbem baıqaýda úlken kómegin tıgizdi. Qazirgi ýaqytta qaıyrymdylyq qorynyń prezıdenti retinde halyqpen tikeleı jumys isteımin. Menińshe, naǵyz memlekettik qyzmetkerdiń bir qasıeti – halyqpen til tabysa bilý. Osy tájirıbe men qarym-qabiletim memlekettik qyzmette de úlken paıdasyn tıgizedi dep senemin», deıdi Prezıdenttik jastar kadr rezerviniń múshesi J.Qýandyq.
