Bıyl qańtar-qyrkúıek aılarynda aımaq aýmaǵyna tartylǵan tikeleı sheteldik ınvestısııa kólemi – 6,6 mlrd teńge, al jalpy ınvestısııa kólemi 25,1 mlrd teńgege jetti. Osy kezeńde AEA kásiporyndary 58,3 mlrd teńgeniń ónimin óndirip, onyń bir bóligi 108,9 mln teńge kóleminde eksporttalǵan.
Aımaqtaǵy óndiristik belsendiliktiń artýy 3 052 jańa jumys ornyn ashýǵa múmkindik berdi. Bul – óńir turǵyndary úshin jańa múmkindikter men turaqty tabys kózi. Qazir AEA aýmaǵynda 55 kompanııa tirkelgen. Onyń 27-si tolyq iske qosylǵan, al 28 joba júzege asyrylý kezeńinde.
Mundaı jobalar óndiristik áleýetti arttyryp, óńir ekonomıkasyn ártaraptandyrýǵa jáne eksporttyq baǵytty kúsheıtýge jol ashyp otyr. AEA qurylǵan sátten beri aımaq ekonomıkasyna salynǵan ınvestısııanyń jıyntyq kólemi 362 mlrd teńgege jetti. Onyń ishinde 179,2 mlrd teńge – sheteldik ınvestısııa.
Bıýdjetten bólingen árbir 1 teńgege shaqqanda 46,4 teńge jeke ınvestısııa tartylyp, 9,1 teńge salyq túsimi qamtamasyz etildi. Bul – «Aqtaý teńiz porty» AEA-nyń tıimdi jumys istep, óńir damýyna naqty úles qosyp otyrǵanynyń aıqyn dáleli.
