Foto: ashyq derekkózden
16 mln gektar alqaptan gektaryna 17 sentner ortasha ónimdilikpen 27 mln tonna astyq qambaǵa quıylǵan. 12,2 mln gektardan bıdaı jınalyp, 20,3 mln tonna bıdaı bastyrylǵan. Bul kórsetkish byltyrǵydan jarty mıllıon tonnaǵa kóp. Sondaı-aq 4 mıllıon tonna arpa jınalsa, burshaq daqyldarynyń ónimi alǵash ret 1 mıllıon tonnaǵa jetken. Maıly daqyldar boıynsha búgingi kúnniń ózinde rekordtyq 4,3 mln tonna jınalǵan. Aıdarbek Saparov ony jıyp-terý boıynsha jumystar áli de jalǵasyp jatqanyn atap ótti.
«Bıyl tek dándi daqyldar boıynsha ǵana emes, sonymen qatar burshaqty jáne maıly daqyldar sııaqty joǵary rentabeldi ári suranysqa ıe daqyldar turǵysynan da rekordtyq jyl boldy. Bul daqyldarǵa egis alqaptaryn ártaraptandyrý sheńberinde erekshe nazar aýdaryldy», dedi Aıdarbek Saparov.Kókónisterdi jınaý isi de máresine jetken. Mınıstr bergen esepke súıensek, 2,9 mln tonna kartop, 3,8 mln tonna kókónis, 2,6 mln tonna baqsha daqyldary jınalǵan.
Maqta terý naýqany da aıaqtalǵan. Tamshylatyp sýarýdy qoldaný nátıjesinde keıbir sharýashylyqtar gektarynan 50 sentnerge deıin ónim alǵan. Maqtanyń ortasha ónimdiligi 30 s/ga bolyp, 428 myń tonna shıtti maqta jınalǵan. Bul ótken jylmen salystyrǵanda 42%-ǵa kóp.
