Myńjyldyq murat pen qýattan nár alǵan, ólmes shýaqtan jaralǵan halyqtyń asyl ánderi keshegi sal-serilerdiń kókiregine qonaqtap, Júsipbek, Ǵarıfollalar arqyly búginge jetken sol týyndylardyń kóbi Qaırat Baıbosynovtyń kómeıine bulbuldaı uıa salǵanyn eshkim joqqa shyǵara qoımas. Myńjyldyq saryn men án qanatynda qalyqtaǵan ánshisin qazaq balasy alaqanyna salyp aıalap jatqany búgin ǵana emes. Oǵan deıin Qazaqstannyń halyq ártisi atanǵan ánshi bıylǵy kóktemde ǵana Eńbek Eri retinde marapattalǵanda el qýanǵan. Kúni keshe ǵana Erkeǵalı Rahmadıev atyndaǵy Memlekettik akademııalyq fılarmonııanyń konsert zalynda ánshiniń 75 jasqa tolǵan mereıtoıyna baılanysty án dýmany jelken kótergende, jelpinbegen ártis, serpilmegen kórermen qalmady Astanada. El ónerin ejelgi dáýirden elordaǵa qondyryp qana qoımaı, erteńge ulastyrǵan dańǵaıyr únpazyn tóbesine tutqanyn kórgen halyq ta bir jasap qalǵan shyǵar. Mundaı qolpash pen qurmet, shapalaq pen mahabbat árdaıym ultyn súıgen muraly erlerge jasalatyny belgili. Endeshe, qazaq Qaıratyn súıý arqyly, ánshisin ardaqtaý arqyly óziniń ónegeli ónerin qadirlep otyr degen sóz. Babadan qalǵan baıtaq ónerge ómirin arnap, ózgeshe túlete bilgen Qaırat Baıbosynovtyń repertýarynda halyq ánderi, halyq kompozıtorlarynyń týyndylary, HH ǵasyrdaǵy tanymal kompozıtorlardyń ánderi, jalpy 500-den astam shyǵarma bar delinedi. Mine, sol shyǵarmalardyń birazy Memlekettik syılyqtyń laýreaty Q.Baıbosynovtyń 75 jas mereıtoıyna arnalǵan «Aıbozym, aıhaı bozym» keshinde shyrqalǵanynyń kýágerine aınaldyq. Halyq ystyq yqylaspen qabyldady ánshisin. «Balqýraı», «Qaragóz», «Aqqum» sekildi halyq ánderi, Balýan Sholaqtyń «Ǵalııasy», Aqan seriniń «Maqpaly», uly Abaıdyń «Segiz aıaǵy», Qanapııanyń «Qanapııasy», Úkili Ybyraıdyń «Gákkýi», Shamanyń «Shamasy», Sákenniń «Taý ishinde», Isa Baızaqovtyń «Jeldirmesi» qanatyn kerdi. Nurtýǵan men Súgirdiń termeleri shyrqaldy.
Buǵan deıin óner ıesiniń mereıtoıyn týǵan topyraǵy Jańaarqa, Qaraǵandy atyraby laıyqty atap ótip, at mingizip, qamqaǵa oraǵanyn bilemiz. Sol syı men qurmettiń qorytyndysy ispetti myna keshtiń raıy da ózgeshe sıpat alǵanyn aıtý lázim. Qazir qazaq sahnasynda dástúrli ánniń dańqyn asyryp júrgen mańdaıaldy ánshiler kezinde Qaırat qalyqtatqan ánderdiń tańdaýlylaryn ózinshe shyrqap, qurmetin tanytty. Ataqty Birjan saldyń «Aıbozym» ánin qazaq sahnasynda qaıta «tiriltken» kesh ıesi eken. Sodan beride qansha zaman ótti. Mańdaıyna jazylǵany shyǵar, dala dańǵaıyrynan jetken ánniń ataýyndaı ózi de aıboz ánshige aınaldy. Endeshe, kesh ataýynyń ózinde mán bar. Bul týyndyny osy keshte dástúrli ánshi Jaqsykeldi Kemalov shyrqap saldy. Sonymen qatar Ramazan Stamǵazıev, Aıgúl Qosanova, Nuraı Tanabaev, Yrysty Súleımenova, Serjan Musaıyn, Erlan Rysqalı, Medet Salyqov pen Klara Tólenbaeva, Ershat Qaıyrhan, Elmura Jańabergen, Nurjan Janpeıisov, Erkin Shúkiman, Ardaq Isataeva, Aıtbek Nyǵyzbaev, О́zgeris Sherikbaı, Jaqsygeldi Maıasarov, E.Rahmadıev atyndaǵy Memlekettik akademııalyq fılarmonııasynyń kameralyq hory men «Qorqyt» etno-folklorlyq ansambli óner kórsetti.
Áıgili ánshi ǵana emes, qanshama shákirt tárbıelegen ustazdy Astana qalasynyń ákimi Jeńis Qasymbektiń atynan qala ákiminiń orynbasary Eset Baıken quttyqtap, qala basshysynyń ystyq yqylasyn jetkizdi.
Qaırat Baıbosynov 15 jasynda Nurǵısa Tilendıevtiń kózine túsip, batasyn alǵan desedi. Mádenıet pen óner qaıratkeri Jeksenbek Erkinbekovtiń shaqyrýymen án alyby Júsipbek Elebekovke shákirt bolǵan. Nurǵısa aǵasynyń qoldaýymen 19-aq jasynda «Qyz Jibek» fılminde án salǵany elge málim. Odan beride halqymyzdyń klassıkalyq týyndylaryn shetel sahnalarynda oryndap, sońynan ańyz ertkenin termeleı berse, taýsylmaıtyn áńgime.
El mereıine bólengen kezin ánshi «Gúlder» ansamblindegi ýaqytymen baılanystyrady. Ustazdyq jolda Qurmanǵazy atyndaǵy Qazaq ulttyq konservatorııasynda professor, kafedra meńgerýshisi, J.Elebekov atyndaǵy respýblıkalyq estrada-sırk kolledjiniń dırektory bolǵany óz aldyna. 2009 jyly Astanaǵa kelip, K.Baıseıitova atyndaǵy Qazaq ulttyq óner ýnıversıtetinde «Halyq áni» kafedrasyn uıymdastyryp, basqardy. «Gúlderde» serilik dáýren súrip, el ishiniń yqylasyna bólengen óner ıesi keıingi qyryq jylǵa jýyq ýaqytta biryńǵaı shákirt tárbıelegen eken.
Kesh barysynda mereıtoı ıesimen suhbat órbip otyrdy. Ánge aınalǵan Qaırat Áýkenuly ózinen buryn ótken Dánesh Raqyshev, Jánibek Kármenov haqynda sóılep, ekran arqyly joldanǵan memleket qaıratkeri Dúısen Qaseıinov quttyqtaýyn qabyl aldy.
Qos maǵynasynda da qazaq ániniń Qaıraty qaryshtaı bersin!
