Foto: istockphoto.com
Polısııanyń dereginshe, egde jastaǵy áıelge WhatsApp arqyly ózin «Qazposhta» qyzmetkerimin dep tanystyrǵan er adam habarlasyp, sálemdeme kelgenin aıtqan. Ol zeınetkerden jetkizý prosesin «rastaý» úshin telefonyna kelgen SMS-kodty aıtýyn suraǵan.
Budan soń áıelge ózderin Ádilet mınıstrligi men Ulttyq banktiń qyzmetkerlerimiz dep tanystyrǵan ózge adamdar qońyraý shalǵan. Olar zeınetkerdiń banktik shottaryna «alaıaqtyq áreketter jasalýy múmkin» dep qorqytyp, aqshany «qorǵaý» úshin óz nusqaýlaryn oryndaýdy ótingen.
Alaıaqtardyń sózine senip qalǵan áıel páterin satyp, jınaǵan qarajatyn sheship, tipti altyn áshekeılerin de lombardqa ótkizgen. Zeınetker barlyǵy 11 mıllıon teńgeden astam qarjyny olardyń esepshottaryna aýdarǵan.
Qazir atalǵan fakti boıynsha tergeý amaldary júrip jatyr. Polısııa qyzmetkerleri azamattardy, ásirese egde jastaǵy týystaryn alaıaqtardyń túrli aılasyna aldanbaýǵa shaqyrady.
