Foto: depositphotos.com
2022 jyldyń 1 qańtarynan bastap elimizde elektrondyq qyzmet kórsetetin nemese ınternet arqyly otandyq tutynýshylarǵa taýar usynatyn sheteldik kompanııalarǵa salyq salý tetigi engizilgen bolatyn.
Jańa tártipke sáıkes, sheteldik kompanııalar elde tirkelip, qosylǵan qun salyǵyn (QQS) 12% mólsherlememen tóleýge mindetti.
Búginde elimizde 118 sheteldik kompanııa tirkelgen. 2025 jyly olardyń qataryna taǵy 20 iri halyqaralyq uıym qosyldy. Olar:
- Chess.com – shahmat áýesqoılaryna arnalǵan halyqaralyq platforma;
- OpenAI, L.L.C. – ChatGPT jasandy ıntellekt servısiniń ázirleýshisi;
- Canva Pty Ltd. – onlaın-dızaın platformasy;
- Microsoft Ireland Operations Limited – Microsoft kompanııasynyń eýropalyq bólimshesi;
- Canyon Bicycles GmbH – kásibı velosıped óndirýshisi.
Salyqtyń qoldanysqa engen sátinen bastap sheteldik sıfrlyq kompanııalar 118,4 mıllıard teńge kóleminde tólem jasaǵan. Onyń ishinde 48,6 mıllıard teńge – tek 2025 jyldyń úlesi. Bul ótken jylmen salystyrǵanda 20 mıllıard teńgege kóp.
2025 jyly eń iri QQS tóleýshiler qatarynda:
- Valve Corporation – 8,6 mıllıard teńge;
- Apple – 8 mıllıard teńge;
- Temu – 6,2 mıllıard teńge.
Qazir sıfrlyq qyzmetterge salynatyn mundaı salyq júıesi kóptegen damyǵan elde qoldanylady. Atap aıtsaq:
- Eýropalyq Odaq – biryńǵaı e-VAT júıesin engizgen;
- Ulybrıtanııa, Úndistan, Kanada – arnaıy sıfrlyq salyqtar qoldanady;
- Avstralııa, Japonııa jáne Sıngapýr – sheteldik kompanııalar úshin onlaın tirkeýdi jeńildetken.
Qazaqstannyń úlgisi Ekonomıkalyq yntymaqtastyq jáne damý uıymy (EYDU) usynǵan halyqaralyq standarttarǵa tolyq sáıkes keledi.
Sıfrlyq salyq salý tájirıbesin kórshi elder de belsendi túrde engizip jatyr. О́zbekstan 2020 jyldan beri sheteldik sıfrlyq qyzmetterge 12% QQS engizdi. Qyrǵyzstan 2022 jyldan bastap osyǵan uqsas tártip qoldanyp keledi. Al, Reseı 2024 jyldan beri sıfrlyq servısterge 18% QQS salady.
Sıfrlyq QQS engizý arqyly Qazaqstan sıfrlyq ekonomıkany tıimdi retteıtin memleketter qataryna qosyldy. Bul sheshim bıýdjet túsimin ulǵaıtyp, sheteldik kompanııalardyń qyzmetin ashyq ári zańdy etýge múmkindik berdi. Sonymen qatar otandyq IT-kompanııalar úshin teń jaǵdaı qalyptasty.
Qarjy mınıstrliginiń Memlekettik kirister komıteti aldaǵy ýaqytta sıfrlyq ortada salyqtyq ákimshilendirý quraldaryn jetildirý baǵytyndaǵy jumystardy jalǵastyratynyn málimdedi.
