Jarysta el namysyn 100-ge jýyq úmitker qorǵaıdy. Olar sporttyń 15 túrinen baq synaıdy. Komandamyzdyń qorjynyna alǵashqy medaldy Sherzod Davlatov saldy. 60 kg salmaqta beldesken dzıýdoshy kúmis medalǵa ıe boldy. Bastapqy básekelerdiń barlyǵynda qarsylastaryn qapy qaldyrǵan Sherzod fınalda túrkııalyq Salıh Iyldyzǵa úsh «shıdonyń» kesirinen utyldy. Erjan Erenqaıypov (66 kg) pen Mádı Amangeldi (81 kg) de sol mejeden kórindi. Sheshýshi synda Erjan О́zbekstannyń ókili Zamohsharı Bekmýrodovqa ese jiberse, Mádı Túrkııanyń ataqty balýany Vedat Álbaıraqtyń ońaı oljasyna aınaldy. Samalaı Erǵalıeva (63 kg), Aıdar Arapov (90 kg), Nazgúl Maratova (+78 kg) úshinshi orynǵa taban tiredi.
Dzıýdo kúresiniń sheberleri tek kúmis pen qolany qanaǵat tutyp jatqanda Arýna Jangeldına (78 kg) jasyndaı jarqyldady. Islamıadanyń ashylý saltanatynda Qaısar qyz Er-Rııad tatamıinde qarsy kelgenderdiń barlyǵyn qoǵadaı japyryp, altynnan alqa taqty. Fınalda Arýna kamerýndyq Georgıký Mýnesti aıqyn basymdyqpen utty.
Júzýshiler saıysynda Aıbat Myrzamuratov (200 metr keshendi ádis, 100 metr brass) qos qolany qorjynǵa saldy. 50 metrge batterflıaı ádisimen júzýde asqan sheberlik tanytqan elimizdiń qos óreni jeńis tuǵyryna kóterildi. Bul básekede Ádilbek Mýsın bas júldeni oljalasa, Maksım Skazobsov kúmispen kúpteldi. Dál osy qashyqtyqtaǵy áıelder saıysynda Sofıa Spodarenko teńdessiz dep tanyldy. Sondaı-aq quramynda Ádilbek Mýsın, Maksım Skazobsov, Danııl Cherepanov, Ǵalymjan Balabek syndy sportshylary bar bizdiń komanda erkin tásildegi 4x200 metrlik estafetada ekinshi oryndy ıelendi.
Ústel tennısinen elimizdiń erler quramasy eshkimge bet qaratar emes. Bastapqy básekelerde Tájikstan (8:0) men Bahreınniń (8:1) tas-talqanyn shyǵarǵan olar shırek fınalda Qatardy (8:1) bas kótertpeı jeńdi. Bizdiń komandanyń namysyn Kırıll Gerasımenko, Alan Qurmanǵalıev, Aıdos Kenjeǵulov qorǵap jatyr.
Jalpy komandalyq esepte elimiz ázirge besinshi orynda. Qorjynymyzǵa 3 altyn, 5 kúmis, 5 qola medal bar. Alǵashqy úsh oryndy Túrkııa (26+6+4), О́zbekstan (4+9+4), Nıgerııa (4+1+1) quramalary ıelenip tur.
