Jalpy quny 1,2 mlrd teńge bolatyn jedel járdem kólikteri oblys ákimdiginiń qoldaýymen lızıng boıynsha satylyp alynǵan. Zaýyttan jańa shyqqan avtokólikterdiń bári halyqaralyq talaptarǵa saı zamanaýı medısınalyq qurylǵylarmen jabdyqtalǵan.
Jedel medısınalyq kómek qyzmeti jyl basynan beri oblys kóleminde 285 myńnan astam shaqyrtýǵa shyqqan. Nátıjesinde sátti reanımasııalar 30,5% -dan 53,1% - ǵa deıin ósken.
«Búginde árbir ekinshi reanımasııa adam ómirin qutqarýmen aıaqtalady. Sondyqtan bul sandar – jaı qurǵaq statıstıka emes. Onyń artynda sizderdiń eren eńbekterińiz, jaýapkershilikterińiz ben ózderińizge júktelgen mańyzdy mindetke degen adaldyqtaryńyz jatyr. Sizder kún saıyn ınfarkt, ınsýlt, jaraqat jáne basqa da aýyr jaǵdaılarda jedel kómekke jetip, talaı naýqasty ajaldan arashalap qaldyńyzdar. Halyqqa sapaly, qoljetimdi ári ýaqtyly medısınalyq kómek kórsetý – memlekettiń basty mindetteriniń biri. Memleket basshysy búginde densaýlyq saqtaý júıesin damytýdy, dárigerlerge qoldaý kórsetýdi júktep otyr. Keıingi jyldary aýyldyq jerlerde 600-den astam medısınalyq nysan salynyp, paıdalanýǵa berildi. Jyl sońyna deıin qalǵan 55 nysandy tapsyryp, Prezıdenttiń tapsyrmasyn tolyq oryndaımyz. Sonyń ishinde Qostanaı oblysynda 25 nysannyń qurylysy júrip jatyr», dedi mınıstr.
Jańa kólikter osy aptanyń sońyna deıin oblysqa qarasty qalalar men aýdandarǵa jetkiziletin bolady.
Oblys ákimi búginde memleket tarapynan densaýlyq saqtaý salasyn damytýǵa erekshe kóńil bólinip otyrǵanyn atap ótti.
«Memleket basshysy densaýlyq saqtaý salasyn damytýǵa, onyń ishinde materıaldyq-tehnıkalyq bazany nyǵaıtýǵa erekshe nazar aýdaryp otyr. Osy tapsyrmalardy oryndaý úshin óńirde aýqymdy jumys atqarylyp jatyr. Aýyldyq jerlerde medısınalyq nysandardyń qurylysy belsendi júrip jatyr. Byltyr 28 nysan salynsa, jyl sońyna deıin taǵy 4 medısınalyq ortalyq paıdalanýǵa beriledi. Nátıjesinde aýyldarda 32 jańa medısınalyq mekeme jumys isteıtin bolady. Bul nysandar zamanaýı jabdyqtarmen qamtamasyz etilgen. Munyń bári aýyl turǵyndary úshin úlken kómek», dedi Q.Aqsaqalov.
Oblys ákiminiń aıtýynsha, buǵan deıin jedel járdem qyzmetine tıesili júz mashınanyń 76 paıyzy eski bolǵan. Jańa kólikter berilgen soń, atalǵan qyzmet paıdalanatyn avtokólikterdiń 90 paıyzy jańaryp otyr.
Aqmaral Álnazarova Qostanaıda jańa zamanaýı jedel járdem ǵımaraty salyný qajet ekenin atap ótti. Búginde oblys ákimdigi mundaı ǵımarattyń ornyn belgilep qoıǵan. Qazir qurylys jumystarynyń jobalyq-smetalyq qujaty ázirlenip jatyr.
Qostanaı oblysy
