Talqylaýǵa Senat tóraǵasy Máýlen Áshimbaev bastamashy boldy. Shaqyrylǵan qonaqtardyń qatarynda Ulttyq bank tóraǵasy Tımýr Súleımenov, Premer-mınıstrdiń orynbasary – Ulttyq ekonomıka mınıstri Serik Jumanǵarın jáne ekonomıst Aıdarhan Qusaıynov bar.
Palata spıkeri atap ótkendeı, jańa ekonomıkalyq model ishki suranysqa, áleýmettik turaqtylyqqa, uzaqmerzimdi ósýge baǵdarlanýymen erekshelenedi. Ol qabyldanǵan sharalardyń ishinen benzın men dızel baǵasyn ósirýge moratorıı jarııalaý, kommýnaldyq tarıfterdi kóterýge tyıym salý, arnaıy salyq rejimi boıynsha shekteýlerdi alyp tastaý, ıpotekalyq baǵdarlamalardy qarjylandyrý, ShOB-ty qoldaý sııaqty naqty bastamalardy erekshe atap ótti. M.Áshimbaevtyń aıtýynsha, bul baǵytta ári qaraı sapaly transformasııa júrgizý úshin barlyq múddeli tarap úılesimdi jumys júrgizýi qajet.
«Prezıdent Qasym-Jomart Toqaevtyń tapsyrmasymen Úkimet azamattardyń múddelerin qorǵaý úshin ekonomıkalyq reformalar baǵdarlamasy boıynsha túzetý sharalaryn usyndy. Memleket ınflıasııalyq qysymdy tómendetý jáne reformalardyń saldaryn azaıtýǵa naqty qadamdar jasap jatyr. Bul rette iske asyrylyp jatqan baǵdarlamalar qazirgi jaǵdaıdy qoldap qana qoımaı, ekonomıkanyń naqty sektorlaryn, bank júıesin jáne shaǵyn bıznesti damytýdy yntalandyrýǵa tıis», dedi M.Áshimbaev.
Sonymen qatar qatysýshylar eldiń turaqty jáne sapaly ekonomıkalyq ósýiniń negizgi sharttaryna toqtaldy. Olar reformalardy áleýmettik ólsheýmen qatar bıýdjet-salyq transformasııasyna, ártaraptandyrýǵa jáne jańa ekonomıkalyq saıasattyń resýrstaryna qatysty máselelerge erekshe nazar aýdardy.
«Búginde kúrdeli syrtqy konıýnktýra men qurylymdyq syn-qaterlerge qaramastan el ekonomıkasy senimdi ósip kele jatqanyn kórip otyrmyz. Degenmen ishki jalpy ónim kórsetkishteri, ınvestısııa qarqyny nemese eksport kólemi – kartınanyń bir jaǵy ǵana. Prezıdent atap ótkendeı, bul ósýdi árbir azamat sezinýge tıis. Sondyqtan jańa múmkindikter megapolısterde ǵana emes, óńirlerde de qurylyp, ekonomıka adamǵa jumys isteýi kerek, kerisinshe emes. Sondyqtan reformalarǵa nazar birtindep sıfrlardan quralǵan kórsetkishterden – ómir sapasyna, adam kapıtalyn damytýǵa jáne turaqty ınstıtýttardy qalyptastyrýǵa aýysýda. Prezıdent saıasatynyń basymdyǵy – osy», dedi M.Áshimbaev.
Aıta keteıik, Taldau Talks – ashyq dıalogke arnalǵan podkast-platforma. Onda el damýynyń ózekti máseleleri jáne Memleket basshysy júktegen mindetterdi iske asyrýǵa arnalǵan praktıkalyq qadamdar talqylanady.
