Jańa saýda núktesi Jezqazǵan qalasy, Anarqulov kóshesi 9V meken-jaıynda ornalasqan «Januıa» shaǵyn marketinde ashyldy. Munda turǵyndarǵa otandyq jáne jergilikti óndirýshilerdiń azyq-túlik taýarlary naryqtyq baǵadan tómendetilgen baǵamen satylady.
Qazir Jezqazǵan jáne Sátbaev qalalaryndaǵy «Januıa» shaǵyn marketterinde de osyndaı áleýmettik buryshtar jumys istep tur. Bastama óńir turǵyndaryna sapaly ári qoljetimdi azyq-túlik ónimderin usynýǵa baǵyttalǵan. Sonymen qatar basqa da kásipkerlermen áleýmettik baǵyttaǵy saýda núktelerin kóbeıtý maqsatynda kelisimder júrgizilip jatyr.
«Áleýmettik taýarlarǵa halyqtyń suranysy ósip otyr. Qazir 40-tan asa áleýmettik azyq-túlik buryshy ashyldy. Biz bul jumysty toqtatpaımyz. Oblysta Áleýmettik-kásipkerlik korporasııasynyń Ulytaý oblysy ákimdigimen birlesken turaqtandyrý qory bar. Turaqtandyrý qorynda barlyq taýar artyǵymen turady. Kókónister saqtaıtyn qoımada kartop, sábiz, qyryqqabat, pııaz bar. Bizder osy kókónisti satylymda azaıa bastaǵan kezde jeltoqsannyń aıaǵyna qaraı ákele bastaımyz. Naryq baǵasynan tómen baǵamen satylady. Oblys ortalyǵyndaǵy «Sharýa» ortalyq bazarynda da azyq-túlik qorymyz bar. Qazir Qarajal qalasy men Jańaarqa aýdanynan da tapsyrys túsip jatyr. Aldaǵy jyldyń basynda olarda da osyndaı saýda oryny ashylady», deıdi «Ulytaý» ÁKK Tóraǵasynyń orynbasary Erjan Joldasov.
Ulytaý oblysynyń ákimdigi men «Ulytaý» ÁKK aldaǵy ýaqytta da áleýmettik mańyzy bar jobalardy júzege asyrý arqyly óńir halqynyń ál-aýqatyn arttyrýǵa kúsh salmaq.
Ulytaý oblysy
