Sport • 15 Qarasha, 2025

Jarys kúndeligi

20 ret

kórsetildi

2 mın

oqý úshin

20 qarashada shaıbaly hokkeıden erler arasyndaǵy Azııa chempıonatynyń shymyldyǵy túriledi. Bul básekede sary qurlyqtyń eń úzdik tórt komandasy aınalmaly júıe boıynsha saıysqa túsedi. Olar – Qytaı, Qazaqstan, Ońtústik Koreıa, Japonııa. Eske sala keteıik, byltyr Almatyda ótken jarysta jerlesterimiz bas júldeni oljalady.

Ǵalym SÚLEIMEN

Erler arasyndaǵy álemdik reıtıngte elimizdiń birinshi raketkasy Aleksandr Býblık 11-orynda tur. Bul onyń mansabyndaǵy eń úzdik kórsetkish. ATR-diń TOP-10-dyǵyna Karlos Alkaras (Ispanııa), Iаnnık Sınner (Italııa), Aleksandr Zverev (Germanııa), Novak Djokovıch (Serbııa), Teılor Frıs (AQSh), Ben Shelton (AQSh), Aleks de Mınýar (Aýstralııa), Felıks Oje-Alıassım (Kanada), Lorenso Mýzettı (Italııa), Djek Dreıper (Ulybrıtanııa) syndy dúldúlder enip otyr.

Mysyr elinde nysana kózdeýden ótip jatqan álem chempıonatynyń quramynda Aleksandra Le, Arına Malınovskaıa, Elızaveta Bezrýkova syndy mergenderi bar elimizdiń quramasy 50 metrge úsh qalyptan atý saıysynda qola medal ıelendi. Jerlestermiz Qytaı men Shveısarııadan ǵana qalyp qoıdy.

Fýtboldan jasóspirimder arasyndaǵy (U-17) álem chempıonatynyń irikteý týrnırinde elimizdiń quramasy sensasııalyq nátıjege qol jetkizdi. Baýyrjan Saǵyndyqtyń shákirtteri Horvatııanyń Nedelıshe qalasynda ótken matchta alań ıelerin 2:1 esebimen utty. Kezdesýdiń 2-mınýtynda Islam Raqym mergendik tanytsa, 33-mınýtta Iýrıı Frıgan tarazy basyn teńestirdi. Al 45-mınýtta Rasýl Ákimov nysanany dál kózdedi. Osy esep oıynnyń sońyna deıin saqtaldy.

Tennısten Lıonda ótip jatqan «Chellendjer» sanatyndaǵy týrnırdiń alǵashqy aınalymynda Mıhaıl Kýkýshkın ulybrıtanııalyq Bıllı Harrısti utty. 1 saǵat 40 mınýtqa sozylǵan saıys 7:6, 7:5 esebimen aıaqtaldy. Endi otandasymyz fransııalyq Lıýk van Ashemmen kúsh synasady. Beıbit Juqaev kezinde ATR reıtınginde 21-orynǵa deıin kóterilgen 35 jastaǵy Germanııanyń saqa sportshysy Iаn-Lennard Shtrýffqa ese jiberdi – 7:6, 6:7, 4:6.

20 jeltoqsanda Almatydaǵy Balýan Sholaq atyndaǵy sport saraıynda kásipqoı boks keshi ótedi. Jarystyń basty jekpe-jekterinde Elshat Nyǵmetolla (21-0-2, 8 KO) men Armat Armanuly (5-1, 4 KO) aıqasady. Ekeýi de WBA Asia nusqasynyń chempıondyq belbeýine talasady. Olardyń qarsylastary ázirge belgisiz. Sondaı-aq Edil Qojamberdıev (16-2, 16 KO), Álisher Abdýlálim (6-0, 4 KO), Elına Bazarova (1-0, 1 KO), taǵy basqa tanymal bylǵary qolǵap sheberleri óner kórsetedi.