Foto: ashyq derekkóz
Biz, Jarasqan aıtqan «Soǵystan soń týǵan», órteńde ósken órkeni myqty, órisi keń býynnyń tóli edik. Boıymyzda adamzatqa ómirdiń qadiri men qasıetin uǵyndyrǵan jeńimpaz ákeler men jar jolyn sarǵaıa kútip, myna uly ǵalamdy ózderiniń uly saǵynyshymen terbetken analardyń mahabbaty men qushtarlyǵy bar edi. Bizdi ádebıet deıtin syry men sıqyry ushan-teńiz sol qaıypberen minezdi álemge ákelerimiz ben analarymyzdyń ómirge degen sol mahabbaty men sol qushtarlyǵy alyp kelip edi.
Kúlásh sol býynnyń aq bantıgin aq jaýlyqqa aýystyryp, otbasy baqyty men aqyndyqtyń azapqa toly shynaıy mehnatty baqytyn názik júregimen qaıyspaı kótergen, qazaq jyryn álemtaný men adamtanýdyń nurly, syrly, sony sıpattarymen baıytqan dara bitimdi, asa kórnekti sırek aqyndarymyzdyń biri hám biregeıi edi. Kúlásh qazaq óleńinde tamyryn tereńnen tartar ulttyq nanym-senim men álemdik poezııanyń mádenıetti jyr jazý mektebin úılestirýdiń sátti úlgisin qalyptady.
Ol qazaq óleńiniń keńistigin óziniń eshkimge uqsamaıtyn ózgeshe órnegimen, qaıypberen minezdi kórkem álemimen baıytty. Kúlásh Ahmetova deıtin esimniń endi ekinshi – ult kóginde juldyz bop jarqyrap janar máńgilik ómiri bastaldy. Halqymen birge jasaıtyn óleńiniń ólmes ómiri.
Rýhy peıish tórinde shalqyp, artyndaǵy ulty men urpaǵyna Uly Jaratýshy baıandy jol buıyrtsyn!
Nurlan Orazalın,
Memlekettik syılyqtyń laýreaty
