Sport • 20 Qarasha, 2025

Balqashta jańa sport kesheni ashyldy

60 ret

kórsetildi

1 mın

oqý úshin

Balqash qalasyndaǵy Metallýrg stadıony aýmaǵynda jańa kópfýnksıonaldy sport zaly ashyldy. Bul zamanaýı nysan – «Qazaqmys» korporasııasy» JShS-niń demeýshiligi jáne «Qazaqstan halqyna» qoǵamdyq qorynyń qoldaýymen júzege asqan, áleýmettik máni zor joba, dep habarlaıdy Egemen.kz.

Qasymhan ǴALYM

Foto: istockphoto.com

Bıiktigi 12 metr, jalpy aýmaǵy 1 320 sharshy metrdi qamtıtyn jańa sport zalynda qazaq kúresimen birge dzıýdo, erkin kúres, grek-rım kúresi jáne sambo sekildi túrli kúres túrlerimen kásibı deńgeıde shuǵyldanýǵa múmkindik bar. Keń ári jaryq ǵımarat halyqaralyq talaptarǵa saı jabdyqtalyp, jattyǵýlar men ártúrli deńgeıdegi jarystardy ótkizýge tolyqtaı beıimdelgen.

Joba aıasynda sport zalyn salýǵa jáne ony zamanaýı qural-jabdyqtarmen qamtamasyz etýge 200 mln teńge kóleminde ınvestısııa tartylǵan. Bul qarajat ǵımaratty turǵyzý, ony tolyq jabdyqtaý jáne barlyq sanattaǵy turǵyndar úshin qoljetimdi ári ınklıýzıvti orta qalyptastyrýǵa baǵyttaldy.

Munda balalar men jasóspirimder úshin turaqty jáne tegin sport seksııalary qarastyrylǵan. Bul Balqash jastarynyń sportpen júıeli túrde aınalysýyna, dene shynyqtyrý mádenıetin qalyptastyrýǵa jáne bolashaq chempıondardyń shyǵýyna múmkindik beredi. Jaqyn ýaqyttarda jańa zal bazasynda túrli deńgeıdegi jarystar men sporttyq-mádenı is-sharalar uıymdastyrý josparlanyp otyr.