Foto: Qaraǵandy oblysynyń ákimdigi
Jańa fýtbol ekojúıesi jáne 18,5 mlrd teńge ınvestısııa
Qaraǵandy oblysynyń ákimdigi men Tımýr Týrlov óńirde jańa fýtbol ekojúıesin qurý jumystaryn bastap ketken. Bul maqsatqa jalpy 18,5 mlrd teńge bólingen:
- 12 mlrd teńge – jańa fýtbol akademııasyn salýǵa;
- 6,5 mlrd teńge – balalar-jasóspirimder men buqaralyq fýtboldy damytýǵa.
Iri jobalar: ALGA!, Freedom BFL jáne zamanaýı akademııa
Qaraǵandy oblysynyń fýtbol qaýymdastyǵy (QOFA) prezıdenti habarlaǵandaı, Tımýr Týrlovtyń qoldaýymen birqatar iri jobalar júzege asyrylyp jatyr. Olar:
- Mekteptik ALGA! jobasy – 2029 jylǵa deıin 40 myńnan astam mektep oqýshysy men 3600 stýdentti qamtıdy, fýtbol bastamalary 100-den astam oqý ornynda iske asyrylady;
- Resmı balalar-jasóspirimder lıgasy Freedom BFL;
- Zamanaýı «Shahtıor» fýtbol akademııasynyń qurylysy jáne óńirdi keshendi damytý strategııasy.
Akademııa oblystaǵy buqaralyq jáne kásibı fýtboldy damytýdaǵy basty nysanǵa aınalyp, ortalyǵynda balalar-jasóspirim fýtboly, ınfraqurylymdyq jobalar men áleýmettik bastamalar ornalasady.
Akademııa shamamen 10 gektar jerdi alady. Joba aıasynda jyl boıy daıyndyq jasaýǵa arnalǵan jabyq manej, tolyq ólshemdi jattyǵý alańy, eki qabatty ákimshilik-bólme kesheni, medısınalyq ortalyq, basseın, saýna, ashana jáne tárbıelenýshilerge arnalǵan jataqhana qarastyrylǵan. Barlyq nysandar jyly dálizder arqyly baılanystyrylyp, aýmaqqa vorkaýt-zona, trenajerlar, saıabaq jáne avtoturaq ornatylady.
Negizgi qurylys jumystaryn 2027 jyly aıaqtaý josparlanǵan.
Jattyqtyrýshylar úshin halyqaralyq taǵylymdamalar men UEFA lısenzııalaryn alý múmkindigin qamtıtyn biliktilikti arttyrý baǵdarlamalary engizilgen. Jańa joba tek qalalarda ǵana emes, aýyldyq eldi mekenderde de júıeli túrde sport ınfraqurylymyn damytýǵa baǵyttalǵan.
Basqa klýbtarǵa kimder ıelik etedi?
Osylaısha, «Shahtıor» sońǵy jyldary jeke ıelikke ótken klýbtardyń qataryna qosylyp otyr. Buǵan deıin «Qaısardyń» ınvestory – «TAU Group Ltd» ókili Islamǵalı Qozbaqov, «Qyzyljardyń» jańa ıesi – kásipker Sergeı Kan, «Jeńis» klýbynyń ınvestory – kásipker Mıhaıl Lomtadze, al, «Aqtóbe» fýtbol klýbynyń jańa ınvestory – Nurlan Artyqbaev bolǵany málim boldy.
Básekelestikti qorǵaý jáne damytý agenttiginiń habarlaýynsha, «Astana», «Atyraý», «Ordabasy», «Turan», «Kaspıı» fýtbol klýbtary da jekeshelendirýge usynylǵan uıymdardyń tiziminde tur.
