Bas prokýror AQSh-ta sammıt jumysyna qatysty

ASTANA. 20 aqpan. AQSh-tyń memlekettik departamenti ǵımaratynda zorlyq ekstremızmge qarsy áreket etý boıynsha sammıt bolyp ótti. Oǵan dúnıejúzinen 60-tan asa delegasııa, sonyń ishinde memlekettik jáne memlekettik emes uıymdardyń, azamattyq qoǵamnyń ókilderi, sarapshylar, din basshylary jáne jastar qatysty. Bul týraly Bas prokýratýranyń baspasóz qyzmeti habarlady. Atalmysh forýmda qazaqstandyq delegasııaǵa Bas prokýror Ashat Daýylbaev jetekshilik etti. Sammıttiń ashylý saltanatynda AQSh Memlekettik hatshysy Djon Kerrı jáne BUU-nyń Bas hatshysy Pan Gı Mýn sóz sóıledi. Forýmnyń birinshi sessııasynan soń AQSh prezıdenti Barak Obama baıandama jasady. Forýmnyń basty maqsaty zorlyq ekstremızmge qarsy is-áreket josparyn ázirleý bolyp tabylady, bul jospar BUU Bas Assambleıasy memleket basshylarynyń kezdesýinde qabyldanady dep kútilýde. Kún tártibinde qozǵalǵan negizgi taqyryptar zorlyq ekstremızm damýynyń aldyn-alý, onyń basty qozǵaýshy kúshin joıý, qaýipsiz qaýymdastyqtar qurýǵa qatysty máseleler boldy. Forýmda sóz sóıleý barysynda A.Daýylbaev zorlyq ekstremızmniń barlyq túrleriniń aldyn-alý jáne olarǵa qarsy kúresýde álemniń barlyq elderiniń kúshin jumyldyrý ıdeıasyn qoldaı otyryp, elimizde ekstremızm men terrorızmniń aldyn-alý boıynsha qabyldanyp jatqan sharalar týraly baıandady. Bas prokýror atap ótkendeı, halyqaralyq qaýipsizdikke qater týǵyzatyn ekstremızm men terrorızm tosqaýyl qoıýdyń jańa tásilderin jáne álemdik qaýymdastyqtyń neǵurlym tereń ıntegrasııasyn talap etedi. A.Daýylbaevtyń pikirinshe, ortaq kúsh radıkaldy ıdeologııany taratýdyń aldyn-alý jáne joıýǵa, ekstremızm men terrorızm profılaktıkasynyń tıimdi tásilderi boıynsha tájirıbe almasýǵa, áskerı is-qımyldarǵa qatysý úshin azamattardyń shetelderge shyǵýyna jol bermeýge, ózge elder terrıtorııasynda jasyrynýǵa tyrysqan radıkaldy elementterdi ýaqtyly izdestirý jáne qamaýǵa alýǵa, terrorızmdi qarjylandyrý faktilerine jol bermeýge baǵyttalýy tıis. Sóz sońynda Bas prokýror zorlyq ekstremızm boıynsha kelesi aımaqtyq sammıtti osy jyly Astana qalasynda ótkizýdi usyndy. Forýmnyń qorytyndysy boıynsha birlesken kommıýnıke qabyldanyp, onda qatysýshylar zorlyq ekstremızmniń barlyq túrlerine qarsy kúresýge ózderiniń shynaıy nıetin bildirdi, sonymen qatar qoǵamnyń radıkaldanýyna qarsy turýda álemdik qaýymdastyqtyń kúshin jandandyrý qajettigin atap aıtty. Osyǵan oraı, ekstremızmmen kúreste azamattyq qoǵamnyń, sondaı-aq jastardyń, áıelderdiń, dinı, mádenı jáne bilim berý uıymdary basshylarynyń róli óte zor ekendigi aıtyldy. Áleýmettik, ekonomıkalyq jáne saıası saladaǵy, ásirese, zorlyq ekstremızmge tótep bere almaıtyn azshylyqqa qatysty máselelerdi sheshýge asa nazar aýdaryldy. Otyrysqa qatysýshylardyń ortaq pikirinshe, Vashıngton sammıti ekstremızmdi taratý jáne nasıhattaýǵa qarsy áreket etýdiń jalpyǵa ortaq baǵdarlamasyn ázirleýge jáne onyń aldyn alý boıynsha tıisti sharalardy daıyndaýǵa baǵyttalǵan dúnıejúzi boıynsha ótetin aımaqtyq kezdesýler men basqa da is-sharalardyń bastamasy bolyp tabylady. Joldybaı Bazar. Derek: Bas prokýratýranyń baspasóz qyzmeti. Sýret: bnews.kz.