Foto: istockphoto.com
Depýtat Ashat Aımaǵambetov jedel járdemge kúsh kórsetý – jaı ǵana tóbeles emes, tikeleı adam ómirine qaýip tóndiretin áreket ekenin atap ótti.
«Mas buzaqy jedel járdem júrgizýshisin urǵan kezde, ol ony ǵana uryp jatqan joq. Ol – kórshi kóshede tynysy toqtap jatqan, dene qyzýy kóterilip, sol járdemdi kútip jatqan kishkentaı balany urdy. Ol – ınsýlt nemese ınfarkt alǵan, endi sol jedel járdem jete almaıtyn ájeni urdy. Bir buzaqynyń kesirinen jedel járdemniń bir brıgadasy, kóligi isten shyǵyp qalady. Sondyqtan osy járdemniń naýqastarǵa jetý ýaqyty uzardy. Al ınfarkt pen ınsýlt kezinde esep saǵatpen emes, mınýtpen ólshenetinin jaqsy bilemiz. Sondyqtan bul – ómir men ólim máselesi», dedi ol.
Depýtat sońǵy bes jylda Densaýlyq saqtaý mınıstrligi 280 fakti tirkegenin, biraq bul kórsetkish naqty jaǵdaıdyń shaǵyn bóligi ǵana bolýy múmkin ekenin aıtty. Onyń paıymynsha, búginde kóptegen medısına qyzmetkeri shaǵymdanbaıdy.
«О́ıtkeni olardy qorǵaıtynyna senim joq. Buǵan qosa, dárigerler jumystyń ornyna tergeýmen júrýge ýaqyt joǵaltqysy kelmeıdi», dedi Ashat Aımaǵambetov.
Esterińizge sala keteıik, Qostanaıda kezek kútip turǵan naýqastyń biri orynsyz janjal kóterip, dárigerge judyryq jumsaǵan. Oqystan tıgen soqqynyń saldarynan hırýrg jansaqtaý bólimine túsken.
Sonymen qatar Qaraǵandyda 12 maýsym kúni oblystyq balalar aýrýhanasynda 38 jastaǵy er adam eki dárigerge kúsh qoldanǵan.
