Ákimniń aıtýynsha, PepsiCo kompanııasy Lays chıpsterin shyǵarý úshin Narynqolda ósirilgen kartopty paıdalanatyn bolady, al Mars óńirde jańa óndiristik jeli ashý múmkindigin qarastyrýda. Sonymen qatar halyqaralyq qonaqúı ındýstrııasynyń alyptary – Marriott jáne Hilton brendteri Qonaev pen Alataý qalalarynda jańa qonaqúıler salýdy josparlap otyr. Bul qadam óńirdiń týrızm jáne bıznes-týrızm naryǵyna aıtarlyqtaı serpin bermek.
Almaty oblysy týrızm men ınfraqurylymdy damytý baǵytynda da qarqyndy jumys júrgizýde. ASP-Arena sport-týrızm kesheni, «Oi-Qaragai» kýrortynyń keńeıýi, jaǵajaılar men demalys aımaqtaryn abattandyrý — osynyń aıqyn dáleli.
О́ńirde qazirdiń ózinde birneshe iri ınvestısııalyq jobalar júzege asyrylyp jatyr. Olardyń qatarynda: quny 70 mlrd teńge bolatyn Focus Logistics logıstıkalyq parki, beton ónimderin shyǵaratyn «Altyn taǵa» zaýyty, zamanaýı LC Waikiki kóterme-taratý ortalyǵy, eksportqa baǵyttalǵan Shin-Line fabrıkasy, astyq pen maıly daqyldardy tereń óńdeıtin «Qapshaǵaı Bıdaı О́nimderi» agrokompleksi, Kegen aýdanyndaǵy «KegenMıasProm» et kombınaty bar.
Jyl sońyna deıin taǵy birneshe A-sanatyndaǵy obektiler iske qosylady. Olar – MP Solution, Kusto Logistics, Eýrazııalyq logıstıkalyq park, Imagine Apple Logistics ortalyqtary. Bul jobalar jańa jumys oryndaryn ashyp, óńirdiń ındýstrıaldyq jáne logıstıkalyq hab retindegi áleýetin nyǵaıtady. Sonymen birge, Almaty oblysynda shaǵyn jáne orta bıznes te qarqyndy damýda: jumys isteıtin sýbektiler sany 156 myńnan asty, al olardyń ekonomıkalyq úlesi 46%-ǵa jetti.
