Foto: egemen.kz
Mamandardyń aıtýynsha, ınfeksııalyq aýrýǵa shaldyǵatyndardyń basym bóligi tıisti ekpeni saldyrmaǵandar eken.
Sonymen qatar elimizde balasyna ekpe saldyrýǵa qarsy ata-analar jyl ótken saıyn kóbeıip keledi. Máselen, 2007 jyly 5300 ata-ana balasyna ekpe saldyrýdan bas tartsa, ótken jyly olardyń sany 20 700-ge jetken. Al bıyldyń ózinde 20 000 ata-ana ekpeden bas tartý týraly ótinishti toltyrǵan.
Halyqaralyq IýNISEF uıymynyń zertteý deregine saı elimizdegi ata-analardyń 60%-y mundaı sheshimdi naqty keleńsiz jaǵdaılardan keıin qabyldaǵan.
Al eresekterdiń 12%-y dinı sebepterge baılanysty ekpe almaǵan bolsa, taǵy 12%-y ekpege senimsizdik tanytqan. Respondentterdiń 6%-y ekpeden bas tartýyna áleýmettik jelidegi aqparattar áser etkenin moıyndaǵan.
Jurtshylyq arasyndaǵy ekpege qatysty teris paıymdardy seıiltý úshin Qoǵamdyq densaýlyq saqtaý ulttyq ortalyǵy ekpe saldyrý isi boıynsha resmı onlaın-portaldy iske qosqan.
Portalda ekpe áseri aýtızm aýrýyn týdyrmaıtyny týraly aqparattar jarııalanady. Sondaı-aq ekpege qatysty kópshiliktiń kókeıindegi saýaldarǵa jaýap berý júıesi jolǵa qoıylǵan.
