Kıberqylmyskerler Apple atynan kelgendeı kórinetin jalǵan SMS nemese iMessage habarlamalaryn jiberip jatyr. Habarlamaǵa fıshıngtik silteme qosa beriledi. Ishinde iPhone-nyń modeli, túsi jáne jad kólemi kórsetilip, habarlamanyń shynaıy ekenine sendiretindeı áser qaldyrady.
Siltemege ótken soń paıdalanýshy Apple Find My servısine vızýaldy uqsas jalǵan paraqshaǵa túsedi. Ol Apple ID logıni men parolin alaıaqtarǵa joldaıdy.
Bul derekter qaskóılerge iPhone-nyń aktıvasııa qulpyn aınalyp ótip, qurylǵyǵa jáne jeke aqparatqa qol jetkizýge múmkindik beredi.
Polısııa qyzmetkerleri alaıaqtyqtyń bul túri keń tarala bastaǵanyn eskertip, qoldanýshylarǵa tómendegideı keńes beredi:
- kúmán týdyratyn siltemelerge ótpeńiz;
- joǵalǵan qurylǵynyń bloktaý ekranynda baılanys aqparatyńyzdy kórsetý qajet bolsa, ol úshin bólek elektrondyq poshta mekenjaıyn qoldanyńyz;
- SIM kartaǵa qol jetkizýdi qıyndatý úshin PIN-kod qoıyńyz;
- qurylǵyny tek icloud.com/find arqyly tekserińiz.
