Foto: Aqorda
«Bul osyǵan deıingi saıası ózgeristerdiń zańdy jalǵasy deýge bolady. Biz «Kúshti Prezıdent – yqpaldy Parlament – esep beretin Úkimet» qaǵıdatyn ornyqtyra túsemiz, ıaǵnı elimiz Prezıdenttik Respýblıka bolyp qala beredi», dedi Qasym-Jomart Toqaev.
Jańa bastama qoǵamda qyzý talqylanyp jatyr. Prezıdenttiń aıtýynsha, parlamenttiń qurylymyna qatysty kóptegen usynys kelip túsip jatyr.
«Mysaly, depýtattardyń sany halyq sanyna sáıkes, ıaǵnı proporsıonaldy bolýǵa tıis degen oılar aıtylýda. Mundaı ustanymmen qaraıtyn bolsaq, olardyń sany 200 adamǵa jetedi. Qazir qos palatada 148 depýtat bar. Parlamenttik reforma – eki palatany jaı biriktire salý degen sóz emes. Menińshe, depýtat sanyn tym kóbeıtýdiń qajeti joq. Kerisinshe, ońtaılandyrý kerek, Parlamenttiń jumysyn jetildirý qajet. Mysaly, bir palataly jańa Parlamentte Prezıdent kvotasy bolmaıdy. Barlyq depýtattar birdeı tártippen saılanýy qajet. Bul – aldaǵy Parlamenttik reforma aıasynda jasalatyn asa mańyzdy qadam. Muny jaqsy uǵynyp, jurtshylyqqa keńinen túsindirý qajet», dedi Qasym-Jomart Toqaev.
Sonymen qatar Memleket basshysy zań shyǵarý organyna bilikti ári tájirıbeli mamandar, ıaǵnı óz isiniń maıtalmandary kelýge tıis eken tilge tıek etti.
«Bir sózben aıtqanda, biz naǵyz kásibı Parlamentti jasaqtaýymyz kerek. Jańa komıtetter qurý máselesin qarastyrý qajet. Sıfrlandyrý, aımaqtardy damytý jumysymen aınalysatyn komıtetter óz aldyna bólek bolǵany jón dep sanaımyn. Bul máselelerdi arnaıy jumys toby muqııat zerdeleıdi. Osy reformaǵa qatysty basqa da kóptegen usynystar bar. Sonyń bárin ábden pysyqtap, keıin jarııalaımyz. Meniń de osy asa mańyzdy reforma boıynsha usynystarym bar», dedi Memleket basshysy.
Memleket basshysy jalpy, Konstıtýsııamyzǵa engiziletin túzetý óte kóp bolýy múmkin ekenin atap ótti.
«Sondyqtan referendým barysynda halyq jańa Ata Zańǵa daýys beretin bolady dep aıtsaq, qatelespeımiz. Osyndaı kúrdeli, jaýapty jaǵdaıda elimizde tynyshtyq, turaqtylyq bolýy kerek. «Zań men tártip» tujyrymdamasyn bárimiz bir qoǵam bolyp saqtaýymyz kerek. Quqyq qorǵaý organdary óz kásibıligin kórsetýi qajet. Arandatýshylarǵa nemese «las, kóleńkeli» saıasatpen aınalysqysy keletin adamdarǵa jol bermeımiz», dedi Prezıdent.
