Kórer jaryǵy bar pasıent stasıonarǵa asa aýyr halde, es-tússiz jaǵdaıda jetkizilgen. Komada jatqan áıeldiń denesiniń sol jaq bóligi jansyzdanyp, qımylsyzdyǵy, aıqyn afazııa men mı qurylymdarynyń zaqymdaný belgileri baıqalǵan. Insýlt ortalyǵynyń saraptamalarynyń nátıjesindn sýbarahnoıdaldyq-parenhımatozdyq qan quıylýy anyqtalady, Bul – ınsýlttiń eń qaýipti túriniń biri. Mundaı jaǵdaıda júrek qarynshalaryna qan ketip, mı isigi kúrt ulǵaıady.
Mundaı oqıǵalardyń basym bóligi naýqas tipti aýrýhanaǵa jetpeı jatyp, qaıǵyly aıaqtalady. Alaıda bul joly ár mınýt sheshýshi ról atqarǵan. Pasıentti mýltıdıssıplınarlyq top-nevrolog, reanımatolog, neırohırýrgter men anestezıolog mamandar birlesip qabyldady. KT-dan bastap angıografııaǵa deıingi árbir tekserý kezeńi bólim meńgerýshileri men №4 QKA ınsýlt ortalyǵy basshylyǵynyń qatysýymen ótken konsılıýmda talqylanyp otyrdy.
Kúrdeli operasııa jasaý týraly sheshim shuǵyl qabyldanyp, emdeý ádisi kidirissiz qurylyp, tar beıindi mamandar tolyq jumyldyryldy. Dárigerler pasıenttiń ómiri úshin kúreste birinen soń biri úsh ota jasady.
«Mı qurylymdarynyń qysylý qaýpi asa joǵary bolǵanyn eskere otyryp, pasıentke úsh otany qatarynan jasaý qajet boldy. Birinshisi – jarylǵan anevrızmany endovaskýlıarlyq embolızasııalaý. Bul – qandy toqtatyp, qaıta jarylýdyń aldyn alýǵa múmkindik beretin zaqymy az neırohırýrgııalyq ádis. Ekinshisi – syrtqy qarynshalyq drenaj ornatý. Onyń maqsaty – basishilik qysymdy tómendetip, mı julyny suıyqtyǵynyń aınalymyn turaqtandyrý. Úshinshisi – mı ishindegi gematomany alyp tastaıtyn dekompressııalyq ota. Bul asa dál mıkroskopııalyq tehnıkany qajet etetin kólemdi neırohırýrgııalyq aralasý», deıdi Almaty №4 qalalyq klınıkalyq aýrýhana neırohırýrgy Aldongar Aısaýtov.
Keıin pasıentke uzaq ýaqyt jasandy tynys aldyrý qajet bolǵandyqtan, traheostomııa jasalyp, bul tynys alýdy qaýipsiz júrgizýge jáne asqynýdyń aldyn alýǵa múmkindik bergen. Pasıent jansaqtaý bóliminde birneshe kún jatty. Osy ýaqytta mamandar toby monıtorıng júrgizip, qarqyndy em-dom qoldanyp, basishilik qysymdy baqylaý, neıroprotektıvtik sharalar, tynys alý, gemodınamıkany turaqtandyrý, sý-elektrolıt tepe-teńdigin túzetý jumystaryn júrgizip otyrǵan. Osyjan keıin birtindep naýqastyń jaǵdaıy durystala bastaǵany, kórsetkishteri jaqsaryp, isiný azaıǵany baıqalady. Kóp uzamaı naýqas tilge kelip, aıaq-qolyna jan bite bastaıdy.
О́mirine tóngen qaýip seıilgennen keıin naýqas beıindi neırohırýrgııa bólimine aýystyrylady. Úı jaǵdaıyndaǵy ońaltý da jaqsy nátıje berdi. Bul kınezıoterapııa, logopedııalyq jumys, neırondyq baılanystardy qalpyna keltirýden turatyn uzaq ári júıeli eńbek bolatyn.
Tórt aı ótken soń dárigerlerdiń ózi buny «durys tańdalǵan taktıkanyń sırek kezdesetin, shabyt syılaıtyn dáleli» dep atady.
Osylaısha bir kúni №4 QKA neırohırýrgııa bóliminiń ordınatorlar bólmesine sózi, júris-turysy tolyq qalpyna kelgen – Valentına Dorofeeva kirip keledi.
«Men osy aýrýhanaǵa, ózimdi emdegen dárigerlerime, barsha medısına qyzmetkerine shyn júrekten rızamyn. Munda tek hırýrgter ǵana emes, adamnyń ómiri synǵa túsken sátte árqaısy óz rólin biletin tutas komanda jumys isteıdi», deıdi Valentına Mıhaılovna.
Bul oqıǵa – mıǵa qatysty aýyr zaqymdanýlar kezinde ýaqtyly ári tıimdi kórsetilgen mamandandyrylǵan medısınalyq kómektiń aıqyn úlgisi. Pasıentti júrgizý úderisi №4 QKA mýltıdıssıplınarlyq toby tarapynan QR DSM qoldanystaǵy klınıkalyq hattamalaryna sáıkes júzege asyryldy.
Bıyl sońǵy 10 aıda neırohırýrg mamandar №4 qalalyq klınıkalyq aýrýhananyń stasıonaryna ınsýltpen túsken 794 pasıent men jedel mı qan aınalymynyń buzylýy dıagnozy qoıylǵan pasıentterge shamamen 300 ota jasaǵan.
ALMATY
