Foto: Týrızm jáne sport mınıstrligi
Qazirgi ýaqytta sportshylar qysqy Olımpıadaǵa qatysýǵa múmkindik beretin joldamalardy alý úshin halyqaralyq jarystar men Álem kýbogi kezeńderine qatysyp jatyr. Olımpıada lısenzııasy sol jarystardaǵy nátıjeler men jınaǵan upaı sanyna qaraı beriledi. Qazaqstan qorjynynda ázirge eki lısenzııa bar. Olar mánerlep syrǵanaýshylar Mıhaıl Shaıdorov pen Sofıa Samodelkınaǵa tıesili.
Qazirgi tańda short-trekten Qazaqstan ulttyq quramasy álemdik týrdy aıaqtady. Bul sport túrinen sońǵy, ıaǵnı IV kezeń ótken apta Nıderland Koroldiginiń Dordreht qalasynda uıymdastyryldy. Endi aldaǵy ýaqytta short-trekten Olımpıadaǵa baratyn sportshylardyń esimderi anyqtalmaq.
Al konkımen júgirý sportshylary 5–7 jeltoqsanda Nıderlandtyń Herenven, 12–14 jeltoqsanda Hamar qalasynda ótetin Álem kýbogi kezeńderinde baq synaıdy.
Mánerlep syrǵanaýdan byltyrǵy álem chempıonatynda Mıhaıl Shaıdorov pen Sofıa Samodelkına Olımpıada normatıvin oryndap, lısenzııa alyp qoıǵan bolatyn. Degenmen, Mıhaıl 4–7 jeltoqsanda Japonııanyń Nagoıa qalasyndaǵy Gran-prı jarysyna, al Sofıa 3–6 jeltoqsan aralyǵynda Horvatııa astanasy Zagrebtegi týrnırge qatysady.
Frıstaıl-mogýl sportshylary 4 jeltoqsannan 2026 jyldyń 18 qańtaryna deıin Fınlıandııa, Kanada jáne AQSh-taǵy Álem kýbogine jáne Fransııadaǵy FIS halyqaralyq týrnırine barady.
Frıstaıl-akrobatıka ókilderi 6 jeltoqsannan 2026 jylǵy 18 qańtaryna deıingi bes Álem kýbogi kezeńinde baq synaıdy. Jarystar Fınlıandııa, Qytaı jáne AQSh-ta (úsh kezeń) ótedi.
Bıatlonshylar alty Álem kýbogi kezeńi men alty IBU aıasyndaǵy halyqaralyq týrnırge qatysýy qajet. Álem kýbogi kezeńderi Shvesııa, Aýstrııa, Fransııa, Germanııa (eki kezeń) jáne Chehııada ótse, halyqaralyq týrnırler Aýstrııa, Italııa, Shveısarııa, Germanııa, Slovenııa jáne Norvegııada uıymdastyrylady.
Shańǵyshylar Fınlıandııa, Norvegııa, Shveısarııa jáne Italııada ótetin bes Álem kýbogi kezeńinde baq synasa, shańǵymen tramplınnen sekirýshiler 12 Álem kýbogine, eki qurlyqtyq, eki FIS kýbogine, eki Aýstrııa-Germanııa týrnırine jáne bir qurlyqaralyq jarysqa qatysady. Jarystar 20 qarashadan 2026 jyldyń 18 qańtaryna deıin josparlanǵan. Ázirge otandastarymyz eki Álem kýbogine qatysyp úlgerdi.
Taý shańǵysy sportshylary toǵyz Álem kýbogi kezeńinde baq synaıdy. Qazir úsh kezeń aıaqtaldy, al aldaǵy alty kezeń 12 jeltoqsan men keler jyldyń 25 qańtary aralyǵynda Shveısarııa, Fransııa, Aýstrııa jáne Chehııada ótedi.
Shańǵy qossaıysynda alty Álem kýbogi bar. Birinshi kezeń Fınlıandııada ótse, keıingileri Norvegııa, Aýstrııa jáne Germanııada uıymdastyrylyp, 4 jeltoqsannan 2026 jyldyń 1 aqpanyna deıin jalǵasady.
