Ishki ister mınıstrligi «Zań jáne tártip» ıdeologemasy aıasynda sıfrlyq saýattylyqty arttyrýǵa, balalar men ata-analarǵa ınternette qaýipsiz júris-turys daǵdylaryn qalyptastyrýǵa baǵyttalǵan keń aýqymdy baıqaý ótkizdi. Qatysýshylarǵa ınternet alaıaqtarynan qorǵaný taqyrybyn ashatyn, onlaın keńistikte saqtyq pen zeıinniń mańyzyn kórsetetin beınerolık daıyndaý usynyldy.
Eldiń túkpir-túkpirinen kelgen ondaǵan qatysýshylardyń ishinde №61 orta mekteptiń 2-synyp oqýshysy — Mereılim Berkinniń jumysy úzdik dep tanyldy. Jas qatysýshy ata-anasymen birge zamanaýı kıberqaýipter týraly jáne olardan qorǵanýdyń tıimdi joldary jóninde qarapaıym ári túsinikti túrde jetkizip, qazylar alqasynyń joǵary baǵasyn aldy.
Oblystyq Polısııa departamentiniń bastyǵy Abaı Jýsýpov Mereılimdi jeńisimen jeke quttyqtap, QR Ishki ister mınıstri Erjan Sádenovtiń atynan oǵan maqtaý qaǵazy men baǵaly syılyq tabystady. Ol mundaı bastamalar balalardyń erte jastan sıfrlyq tehnologııany qaýipsiz paıdalanýdy úırenýine úlken yqpal etetinin atap ótti.
«Bul jeńistiń artynda — ata-anasynyń qoldaýy, synyp jetekshisiniń eńbegi jáne mektep dırektoryna degen senim jatyr. Baıqaýdyń basty maqsaty — balalar men ata-analardyń sıfrlyq saýattylyǵyn arttyrý, ınternet alaıaqtarynan saqtaný joldaryn úıretý», — dedi óńirlik polısııa basshysy.
Mereılimniń jeńisi onyń jeke jetistigi ǵana emes, qoǵamnyń kıberqaýipsizdik máselelerine nazar aýdarýdyń mańyzyn kórsetetin jarqyn úlgi boldy. Polıseıler mundaı jobalar aldaǵy ýaqytta da jalǵasyp, óskeleń urpaqtyń ınternettegi jaýapty ári qaýipsiz júris-turysyn qalyptastyrýǵa yqpal etedi degen senim bildirdi.
