Kórme qazaq jerimen taǵdyrlary toǵysqan álem ádebıetiniń úsh alyp tulǵasy – Aleksandr Pýshkın, Fedor Dostoevskıı jáne Mıhaıl Sholohovtyń shyǵarmashylyq murasy men tarıhı baılanystaryn jan-jaqty tanystyrady. Ekspozısııaǵa XIX–XX ǵasyrlardan qalǵan sırek qujattar, fotomaterıaldar, turmystyq zattar, qoljazba kóshirmeleri jáne ádebı basylymdardan turatyn 101 jádiger qoıyldy.
Taǵylymdy sharanyń saltanatty ashylýy barysynda Almaty mýzeıiniń dırektory Kámshat Baqtyǵalıqyzy usynylǵan jádigerlerdiń qundylyǵyna toqtalyp: ««Bul eksponattar – tek tarıhı derek emes, ótken men búgindi jalǵaıtyn rýhanı kópir. Mýzeıimiz úshin mundaı aýqymdy kórmeni qabyldaý – úlken mártebe. Shara Memleket basshysy Qasym-Jomart Toqaevtyń Qazaqstan halqy Assambleıasynyń 2025 jylǵy 24 sáýirdegi XXXIV sessııasynda bergen tapsyrmalary aıasynda, Mádenıet jáne aqparat mınıstrliginiń bastamasymen iske asyp otyr», dep atap ótti.
Batys Qazaqstan oblystyq tarıhı-ólketaný mýzeıiniń dırektory Jantas Nabıollauly, Pýshkın men Sholohovtyń qazaq jerinen alǵan áseri – búgingi urpaqqa ortaq rýhanı mura ekenin, bul kórme – Tynyq Don men Aq Jaıyq arasyndaǵy tarıhı baılanystarǵa taǵzym retinde júzege asqanyn jetkizdi.
«Halyqtar arasyndaǵy dostyq pen mádenı sabaqtastyqty nyǵaıtý – bizdiń mýzeıdiń basty mindetteriniń biri. Biz uly tulǵalardyń shyǵarmashylyq murasyn elge keńinen tanytý arqyly rýhanı kópirdi nyǵaıta túsemiz», – deıdi ol.
О́z kezeginde F.Dostoevskııdiń ádebı-memorıaldyq mýzeıiniń dırektory Irına Solovıova, qalamgerdiń Semeı kezeńi qazaq rýhanııatymen tereń baılanysty ekenin, kórme sol tarıhı kezeńdi jańa qyrynan kórsetýge múmkindik beretinine toqtaldy.
Aqyn, halyqaralyq «Alash» syılyǵynyń laýreaty Ádilǵazy Qaıyrbekov ádebı baılanys týraly oıymen bólisip, qazaq ádebıeti orys klassıkteriniń úzdik týyndylaryn aýdarý arqyly álemdik rýhanııatpen tereń úndeskenin, bul yqpaldastyq – eki halyqtyń mádenı qazynasyn baıyta túskenin aıtty.
Kórmede Pýshkınniń 1833 jylǵy Oral saparyna qatysty materıaldar, Dostoevskııdiń Semeıdegi ómirin beıneleıtin jádigerler, Sholohovtyń Qazaqstanmen baılanysyn aıǵaqtaıtyn kitaptar, fotosýretter men jeke zattar keńinen usynyldy.
ALMATY
