Qonaqtarǵa óńirdiń ınvestısııalyq áleýeti tanystyrylyp, jergilikti taýar óndirýshilerdiń kórmesi jáne iri óndiristik nysandarǵa týr uıymdastyryldy. Is-shara barysynda 427 mlrd teńgeni quraıtyn 17 memorandým men kelisimge qol qoıyldy. Olardyń qatarynda Hromtaý aýdanynda salynatyn 100 MVt-tyq jel elektr stansııasy (SUNGROW, Qytaı), STG zaýyty (Condor Energies, Kanada) jáne sýsyn shyǵaratyn kásiporyn (Coca-Cola Almaty Bottlers, Túrkııa), metall buıymdary zaýyty ( Qytaı), agroónerkásiptik klaster (Harvest Agro Holding, Shveısarııa), qýaty 180 MVt elektr stansııasynyń qurylysy (MUREL, Túrkııa) bar. Jıyn sońynda qurylyp jatqan «Aqtóbe ekonomıkalyq aımaǵynyń basqarýshy kompanııasy «Gansıýanbao» ekonomıkalyq aımaǵymen (Úrimshi, Qytaı) yntymaqtastyq týraly kelisimge qol qoıyldy.
«Biz árqashan uzaqmerzimdi jáne ózara tıimdi yntymaqtastyqty qoldaımyz. Aqtóbe oblysy geografııalyq ornalasýy jaǵynan qolaıly, barlyq kólik ınfraqurylymdary jaqsy damyǵan, tabıǵı resýrstarǵa baı ári bilikti kadrlarymen erekshelenedi. О́ńirde 19 myńnan astam kásiporyn tirkelgen. Qurylyp jatqan arnaıy ekonomıkalyq aımaǵy, agroónerkásiptik keshendegi jobalar óńirdi ınvestısııa úshin erekshe tartymdy etedi. Jyl basynan beri Aqtóbe oblysyna 892 mıllıard teńge ınvestısııa tartylǵan. Bıyl jalpy quny 110 mıllıard teńgeden asatyn segiz joba júzege asyryldy, onyń ishinde jańartylatyn energııa kózderiniń iri nysany iske qosyldy», dep atap kórsetti óńir basshysy Ashat Shaharov.
Halyqaralyq jıynda sóz alǵan Avstrııanyń Qazaqstandaǵy Tótenshe jáne ókiletti elshisi Andrea Baher Avstrııa memleketiniń 400-den astam kompanııasy Qazaqstanmen baılanys ornatqanyn, ásirese, Transkaspıı halyqaralyq kólik dálizin damytýǵa yqylasty bolyp otyrǵanyn habarlady. «Avstrııa –eksportqa baǵyttalǵan el. Eldegi 10 evronyń altaýy taýarlar men qyzmet kórsetý eksportynan keledi. 2024 jyly Avstrııa men Qazqstan arasyndaǵy taýar aınalymy rekordtyq deńgeıge jetip, 2,8 mlrd evrony qurady. Bıylǵy jyldyń 9 aıynda da osy kórsetkishtiń 11%-ǵa óskeni baıqalady», dedi elshi Andrea Baher.
Aqtóbe oblysy.
