Osyndaıda «qazaq qaıda júrse de, qazaq» degen ataly sózdi aıtpasqa bolmas. Áıgili epos keıipkeriniń esimin ıissýǵa aınaldyrǵan menedjer Nurjandy áńgimege tarttyq. Áýelde úsh jyl IT salasymen aınalysqan. Keıinnen Parıjge qonys aýdarǵan. Saýda basqarý mamandyǵy boıynsha bilim alǵan ol óz armanyn oryndaý úshin fransýz tilin jetik meńgerý qajet ekenin túsinipti. «Qıyn is joq ǵalamda, yqylas qoıǵan adamǵa» demekshi, kóp ótpeı fransýz tilin jaqsy meńgeripti. Bul jetistigi ony ataǵy alataýdaı fransýz kompanııalarynda jumys isteýge jetelepti.
Bala kezdegi armanyna qol jetkizý úshin kóp izdenipti. Talaı jylǵy qulshynys pen úmit, elge degen mahabbat aqyry «Kiz Jibek» brendi bolyp júzege asypty. Onyń aıtýynsha, mundaı qadamǵa barýǵa «Qyz Jibek» jyry áser etken. «Tolegen Paris» atty kompanııa qurǵan Nurjan qazaq mádenıetin sheteldikterge nasıhattaýǵa arnalǵan bul ónimdi 2025 jyldyń mamyr aıynda shyǵarǵan. Syrtqy qoraby qazaqy oıýymen ádiptelip, jýsanmen juparlanǵan ıissý mahabbat pen erkindikti sezindirip turǵandaı. Joba avtorynyń aıtýynsha, bul ónimde dástúr men zamanaýılyqty úılestire alǵan.
Astanaǵa sapary aıasynda Nurjandy Mádenıet jáne aqparat mınıstri Aıda Balaeva arnaıy qabyldady. Bul kezdesý ult mádenıeti men rýhanı murasyn ózge jurtqa nasıhattap júrgen talantty jasty qoldaý ekeni belgili. «Nurjan Tólegen ózi shyǵarǵan bul átirdiń XVII ǵasyrdaǵy qazaq dalasynyń «Qyz Jibek» lırıkalyq jyryn qaıta jańǵyrtqanyn erekshe atap ótti. Onyń osydan birneshe jyl buryn Qazaqstanǵa jasaǵan sapary ómirin túbegeıli ózgertken eken. Sonyń áserinen paıda bolǵan bul brend – Shyǵys pen Batysty baılanystyratyn jańa kópir ispetti. Osyndaı kreatıvti, bastamashyl ári otanshyl jastardy qoldaýǵa shaqyramyn. Bul – bárimizdiń ortaq mindetimiz. Sondyqtan onyń jumysyna sáttilik pen tolaıym tabys tileımin!», dedi mınıstr.
Qazir «Kiz Jibek» ıissýynyń úlken qutysy (100 ml) 235 eýrodan, al kishkene qutysy (15 ml) 39 eýrodan satylymǵa shyqty. Qalaı desek te, alysta júrgen Nurjannyń bul ónimi ult mádenıetin, tarıhyn jańa zamanda ózgeshe qyrymen dúıim jurtqa tanystyra bermek.
