Foto: primeminister.kz
Semınar Qazaqstan men Reseıdiń jetekshi mamandaryn biriktirip, tájirıbe almasý men eldiń zertteý ıadrolyq ınfraqurylymyn odan ári damytý máselelerin talqylaý alańy boldy. Jıyndy Atom energııasy jónindegi agenttik tóraǵasy Almasadam Sátqalıev ashyp, ǵylymı-zertteý bazasyn jańǵyrtýdyń strategııalyq mańyzdylyǵyn atap ótti. Ol sonymen qatar ónerkásip, atom energetıkasy men ǵylymı sektordyń damýy zamanaýı tájirıbelik qondyrǵylardyń qurylýyn qajet etetinin aıtty.
«Memleket basshysy atom salasynyń ǵylymı negizin nyǵaıtýǵa naqty tapsyrma berdi, qoldanystaǵy qondyrǵylardy jańǵyrtyp, jańa qondyrǵylar qurýdy qamtamasyz etý qajet. Iаdrolyq fızıka ınstıtýtynda zertteý reaktoryn salý, sondaı-aq Ulttyq ıadrolyq ortalyqta uqsas jobany júzege asyrý, zamanaýı tehnologııalardy damytýǵa, kadrlar daıarlaýǵa ári ǵylymı-óndiristik múmkindikterdi keńeıtýge baǵyttalǵan mańyzdy qadam. Elimiz ártúrli tehnologııalyq sheshimderge ashyq jáne álemdik tájirıbeni eskere otyryp, ońtaıly konfıgýrasııalardy qaraýǵa daıyn», dedi A.Sátqalıev.
Semınar aıasynda Iаdrolyq fızıka ınstıtýty men «Rosatom Qurylys Tehnologııalary» kompanııasy arasynda ózara túsinistik memorandýmyna qol qoıyldy. Qujat kópmaqsatty zertteý reaktory men zerthanalyq keshendi birlesip jobalaýdy, sondaı-aq atom energııasyn beıbit maqsatta qoldaný salasynda yntymaqtastyqty keńeıtýdi kózdeıdi.
«Rosatom Qurylys Tehnologııalary» JShS-nyń bas dırektory Ilıa Vergızaev Qazaqstandyq seriktesterge yntymaqtastyqty nyǵaıtýdaǵy júıeli jumysy úshin alǵysyn bildirip, jańa reaktor eldiń ǵylymı-zertteý múmkindikterin keńeıtetinin alǵa tartty.
Buǵan qosa, is-shara barysynda Qazaqstan Respýblıkasy men «Rosatom Qurylys Tehnologııalary» kompanııasy arasynda Iаdrolyq ǵylym jáne tehnologııalar ortalyǵyn (IаǴTO) qurý máseleleri boıynsha yntymaqtastyq kelisimine qol qoıyldy. Qujat jobany tehnıkalyq-ekonomıkalyq negizdeýdi daıyndaý men alǵashqy is-sharalardy júzege asyrý aıasynda ózara árekettesýdi maqsat etedi.
Is-shara barysynda mamandar jańa reaktordyń tehnıkalyq tujyrymdamalary men múmkin konfıgýrasııalaryn tanystyrdy, zertteý baǵyttaryn, perspektıvaly materıaldardy, zamanaýı ızotoptyq tehnologııalardy jáne jańa ǵylymı nysandy iske qosqanda sheshiletin mindetterdi talqylady.
Birinshi kúnniń qorytyndysy retinde qatysýshylar bolashaq zertteý reaktoryn jobalaý men qoldaný nusqalary boıynsha pikir almastyrǵan dıskýssııalyq sessııa ótti.
