Foto: freepik.com
Áleýmettik jelilerde birneshe adam polıseıdiń súıemeldeýimen bir jigitti kúshtep alyp ketip bara jatqan vıdeo tarady. Oqıǵa «Arýjan» saýda ortalyǵynda bolǵan. Áskerı komıssarıat qyzmetkerleri jas jigitti jumysta turǵan jerinen áskerge alyp ketpek bolǵan.
Oqıǵa kelýshiler men qyzmetkerlerdiń kóz aldynda, ashyq túrde bolǵany atap ótildi.
Astana qalasy Qorǵanys isteri jónindegi departamenttiń habarlaýynsha, 4 jeltoqsanda departament qyzmetkerleri polısııamen birlesip is-shara júrgizgen. Sonyń barysynda 2002 jyly týǵan, áskerge shaqyrylýshylar qatarynda bar azamat toqtatyldy.
«Tekserý kezinde atalǵan azamattyń buryn áskerı qyzmetke jaramdylyǵyn anyqtaý úshin mindetti medısınalyq tekseristen ótpegeni belgili boldy. Oǵan qalalyq jınaq pýnktine barý usynyldy, alaıda ol bas tartty. Qoldanystaǵy zańnamaǵa sáıkes, azamat medısınalyq komıssııadan ótýge arnaıy mekemege jetkizildi», dedi departamenttiń baspasóz qyzmeti.
Alǵashqy medısınalyq tekseris qorytyndysyna sáıkes, ol turaqty tirkelgen mekenjaıy boıynsha qosymsha tekserilýge jiberilgen. Qajetti joldama berilip, keıin úıine qaıtqan.
«Azamat tarapynan qandaı da bir zańsyz áreketter boıynsha shaǵym ne ótinish túsken joq», dep atap ótti Astana qalasy Qorǵanys isteri jónindegi departamenti.
