Kúni keshe atalǵan kitaphanada Jazýshylar odaǵynyń múshesi, qaraǵandylyq aqyn Músirkep Seıdahmettiń «Joqshy» atty jyr kitaby tanystyryldy jáne avtordyń 70 jasyna oraı «Káýsaryn jyrdyń atqylap, tas jaryp shyqqan qaınarmyn» atty kezdesý uıymdastyryldy. Aqynnyń jyr jınaǵyna týǵan el men jerge degen súıispenshiligi, ulttyq bolmysqa, tarıhı jadyǵa degen saǵynyshy, rýhanı izdenisi men paıymy týraly tolǵanystary toptastyrylǵan. «Joqshy» – qazaqtyń joǵyn joqtap, baryn baǵalaýǵa úndeıtin syrshyl týyndy.
Aqyn-jazýshy Serik Saǵyntaı tizgindegen kezdesý keshinde Mádenıet jáne aqparat mınıstrligi Arhıv, qujattama jáne kitap isi komıtetiniń Kitap isi basqarmasynyń basshysy Almas Myrzahmet aqynǵa mınıstrdiń quttyqtaý hatyn tabystady. Jazýshylar odaǵy Astana qalalyq fılıalynyń tóraǵasy, aqyn Baýyrjan Babajanuly mereıtoı ıesine odaqtyń basqarma tóraǵasy Mereke Qulkenovtiń quttyqtaý hatyn oqyp, ıyǵyna shapan japty. Aqyn Muharbek Jákeı kitap avtorynyń jyr shýmaqtaryna toqtalyp, shuraıly tustarynan úzindi keltirdi. Zamandas baýyry, belgili aqyn Dáýren Berikqajyuly:
«Jaqsy óleń jazsam boldy dep
Júretin aqyn kóp júdep,
Júregin ustap tap-taza
Jetpiske keldi móldirep.
Qııalyna on túnep
Qazaǵyn oılap tońdy kóp,
Pesh qalap júrip aýylda
Qoı baqqan aqyn sońǵy ret.
Ustaǵan qoly mol kúrek
О́mirdi óleń kórdi tek.
Pańsyǵan jurttyń bárine
Paıǵambar syndy eljirep», degen shýmaqtarymen joldady lebizin.
Kesh barysynda óleń oqylyp, án shyrqalyp, oqyrmandar avtordan qoltańba aldy.
