Is-shara barysynda oblys basshysynyń orynbasary mádenıet qyzmetkerleriniń Jetisý óńiriniń óneri men rýhanı ómirin damytýǵa qosyp otyrǵan eńbegine erekshe toqtaldy. Onyń aıtýynsha, sala mamandarynyń alańsyz ári sapaly jumys isteýine jaǵdaı jasaý, mádenıet nysandarynyń materıaldyq-tehnıkalyq áleýetin kezeń-kezeńimen kúsheıtý – jergilikti bıliktiń basym baǵyttarynyń biri. Osy maqsatta mádenıet uıymdarynyń avtoparki shaǵyn avtobýstar men júk kólikterimen tolyqtyrylyp otyr. Jańa tehnıkalar shyǵarmashylyq ujymdardyń gastroldik saparlaryna shyǵýyna, qural-jabdyqtar men sahnalyq dekorasııalardy tasymaldaýyna, túrli festıvalder men baıqaýlarǵa belsendi qatysýyna múmkindik bermek.
Atalǵan kúni oblystaǵy 8 aýdandyq jáne 2 qalalyq mádenıet úıine, Sáken Seıfýllın atyndaǵy oblystyq ámbebap kitaphanaǵa, oblystyq arhıvke, Kórkemsýret galereıasy men Halyq shyǵarmashylyǵy ortalyǵyna barlyǵy 13 «Gazel» markaly shaǵyn avtobýs pen 1 júk kóligi tapsyryldy.
Jańa tehnıkany alǵan mekemeler atynan Alakól aýdandyq Zeınep Qoıshybaeva atyndaǵy mádenıet úıiniń dırektory Otan Smaǵulov sóz sóılep, mádenıet salasyna kórsetilip otyrǵan qoldaýǵa rızashylyǵyn bildirdi. Onyń aıtýynsha, bir kúnde osynshama avtokóliktiń mádenıet nysandaryna berilýi – óńir tarıhyndaǵy erekshe oqıǵa. Bul ulttyq qundylyqtardy dáriptep júrgen óner qyzmetkerlerine kórsetilgen naqty qamqorlyq ári shyǵarmashylyq serpin beretin mańyzdy qadam. Sondaı-aq ol Alakól aýdanynda tórt jańa mádenıet nysanynyń salynyp jatqanyn, olardyń biri jaqyn arada paıdalanýǵa beriletinin atap ótti.
Aıta keteıik, bul ıgi bastama bıyl ekinshi jyl qatarynan ótken «Jer jannaty – Jetisý» oblystyq televızııalyq baıqaýynyń marapattaý rásimi men gala-konsertimen jalǵasyn tapty.
Jalpy, Jetisý oblysy qurylǵan ýaqyttan beri mádenıet salasynyń ınfraqurylymy 36,2 paıyzǵa jańartyldy. Sońǵy úsh jylda sala mekemeleriniń materıaldyq-tehnıkalyq bazasyn nyǵaıtýǵa 1 mlrd teńgeden astam bıýdjet qarajaty bólinip, mýzykalyq aspaptar, sahnalyq kıimder, kompıýterlik tehnıka jáne ózge de qajetti quraldar satyp alyndy. Qazirgi tańda óńirde 300-den astam mádenıet jáne arhıv mekemesi halyqqa qyzmet kórsetip keledi.
