QOSTANAI. 23 aqpan. Qostanaıdaǵy E.О́mirzaqov atyndaǵy fılarmonııada koreı dıasporasy ózderiniń jańa jyl (Sollal) merekesin atap ótti. Osy mereke aıasynda dıapora ókilderi jármeńke jáne konsert uıymdastyrdy. Bul týraly ng.kz habarlady.
Fılarmonııa foıesinde koreı halqynyń ulttyq kostıýmin kıgen qyzdar qonaqtardy qarsy aldy. Koreı ashanasy erekshe salattarymen, dámdi taǵamdarymen erekshelenedi. Sonymen qatar, osy joly koreı dıasporasy ókilderi halyqtyq órnegi bar buıymdarmen jáne shyǵys náziktigin beınelegen sýrettermen kelýshilerdi tańqaldyrdy. Qurylǵanyna 15 jyl tolǵan «En kodı» ansambli án áýeletti.
Koreı dıasporasy basqarmasynyń múshesi Larısa Shaı: «Koreı jańa jyly týystyq qarym-qatynasty saqtaý dástúrin dáripteıdi. Bul merekede týystar ata-anasynyń nemese otbasynda úlken baýyrdyń úıine jınalady. Merekege daıyndyq bir aı buryn bastalady, óıtkeni koreı ashanasy kúrdeli, taǵamdardy daıyndaý uzaq eńbekti qajet etedi. Bizdiń halyqtyń senimi boıynsha osy kúni ólgender birshama ýaqytqa jerge qaıta keledi, tamaqtan aýyz tıedi dep esepteledi. Sol úshin stoldyń ústinde keminde 20 túrli taǵam bolýy tıis. Ásirese, mereke dastarhany kúrishten jasalǵan ttokkýk sorpasynsyz bolmaıdy. Osy sorpany ishken kisi bir jasqa ósti dep esepteledi. Ony densaýlyǵy jaqsy bolýy úshin balalarǵa beredi», dedi.
Sollal otbasylyq mereke sanalady. Bul kúni ata-anasymen qatar, qaıtqan týystarynyń rýhyna taǵzym etedi. Merekede adamdar birin biri quttyqtaıdy, balalar úlkenderge sálem berip, olardyń batasyn, syılyǵyn alady. Keshtetip týystar kóshege shyǵyp, qaǵazdan jasalǵan jylandar ushyrady.
Názıra Járimbetova.
Derek, sýret: ng.kz.
