ASTANA. 23 aqpan. «Barys» óz aıdynynda Novosıbırskiniń «Sıbır» komandasynan 1:0 esebimen basym tústi. Bul týraly egemen.kz habarlady.
Aıdyndaǵy aıqas birden hokkeıshilerdiń teke-tiresimen bastaldy. Nebári 2-mınýtta «Barystyń» «jolbarysy» atanyp júrgen Damır Ryspaev «Sıbır» senim artqan myqty Vıtalıı Menshıkovty sabasyna túsirdi. Qos hokkeıshi osymen sońǵy bir aıda ekinshi ret judyryqtasty. Ekeýinde de Damırdiń basym túskenin aıta keteıik.
Oıyn barysyna keler bolsaq, qarsylastar alǵashqy eki kezeńde bir-biriniń osal tusyn taba almady. Tek kezdesýdiń aıaqtalýyna 4 mınýt qalǵan kezde «Barystyń» qorǵaýshysy Kevın Dallmen «Sıbır» qaqpasynan sańylaý tapty. Nátıjeli shabýyldy uıymdastyrǵan komanda kapıtany Brendon Bochenskı men Naıdjel Doýs bolatyn. Qalǵan ýaqytta esep ózgermeı, aıdyn ıeleri qatarynan tórtinshi jeńiske qol jetkizdi.
Dallmen 380 oıynda 300 upaı (113 gol+187 nátıjeli pas) jınap, Lıga tarıhynda osynsha nátıje kórsetken alǵashqy qorǵaýshy atandy. Osylaısha ol Qurlyqtyq hokkeı lıgasynyń rekordyn ornatty.
Búginde «Barys» 90 upaımen QHL-dyń Shyǵys konferensııasynda 5-orynda keledi. Astanalyqtardyń Lıganyń turaqty chempıonaty aıasynda endi bir oıyny qaldy. 24 aqpan kúni óz aıdynynda Nıjnıı Novgorodtyń «Torpedosyn» qabyldaıtyn Andreı Nazarovtyń shákirtteri pleı-off kezeńine joldama alǵany belgili. Bul kezeńniń alǵashqy satysynda «Barys» ombylyq «Avangardpen» kúsh synasady. О́z kezeginde, reseılik komanda 107 upaımen Shyǵys konferensııasynda 4-orynǵa taban tirep tur. Al osy konferensııada top jarýdan basty úmitti bolǵan «Sıbır» Astanadaǵy jeńilisten keıin jaǵdaıyn nasharlatyp aldy. Endi olarǵa «Shyǵystyń» myqtysy ataný úshin sońǵy oıynda jeńip qana qoımaı, basty qarsylasy qazandyq «Aq Barstyń» jeńilýin tileýden basqa amal joq.
Elaman Qońyr.
Derek: egemen.kz.
Sýret: hcbarys.kz.
