Bekarys Shoıbekov, Jansaıa Mýsına, Muhtar Nııazov syndy aıtýly aqyndar qatysqan aıtystyń tartysty ótkenine kórermen de kýá. Jobany qoǵam qaıratkeri Amanjol Áltaı júrgizip, aıtys barysyna salmaq pen ádildik darytty.
Fınalǵa «Aıtystyń aqtańgeri», qostanaılyq Aıbek Qalıev pen astanalyq Erkebulan Qaınazar joldama alyp, «Qazaq úshin otan jalǵyz, tý jalǵyz» taqyrybynda tartysty aıtys ótkizdi. Bul kezdesý aǵa men ini arasyndaǵy syılastyqty, el aldyndaǵy jaýapkershilikti, aıtysqa tán mádenıetti aıqyn kórsetti. Tórelik tizginin aıtystyń abyzy Júrsin Erman ustady.
Fınaldyń bas júldesi – «Q4 Tulpar» usynǵan avtokólik. Tartysty jekpe-jek pen qaıym aıtystyń qorytyndysyn saralaǵan qazylar alqasy Aıbek Qalıevti jeńimpaz dep tanyp, Bas júlde – avtokólik pen «Altyn qamshy» júldesin tabystady. Aıtysker aqyn Erkebulan Qaınazar birinshi oryn alyp, 5 mıllıon teńge júldeni qanjyǵasyna baılady. Ekinshi oryn Dıdar Qamıevke (3 mln teńge), úshinshi oryn Jansaıa Mýsınaǵa (2 mln teńge) berildi. Kórermen kózaıymy atanǵan - Aıym Asylbekqyzy (500 000 teńge). Al taǵy bir avtokóliktiń ıesi kásipker Talǵat Saqanovqa erekshe unaǵan aıtysker Nurbol Jaýynbaev boldy.
«Bul jyl men úshin óte sátti boldy. Aıtys ónerindegi shyǵarmashylyǵymdaǵy sońǵy jylym. Abyroıdyń bıigimen aıtyspen qoshtasyp jatyrmyn. Osy jekpe-jek aıtysta tól ónerimizdi nasıhattap uıymdastyryp jatqan Aıtys aqyndary men jyrshy-termeshiler odaǵy, Júrsin aǵamyz bastaǵan, Amanjol aǵamyz qostaǵan odaqqa jáne jekpe-jek aıtysqa alań berip otyrǵan «Habar» arnasyna, qazaq halqyna kóp-kóp raqmet aıtqym keledi», dedi Aıbek Qalıev.
Jobanyń joǵary deńgeıde ótýine Magnum kompanııasynyń da qoldaýy zor boldy. «Habar» Agenttiginiń tóraǵasy Kemelbek Oıshybaev arna efırinde alashtyń bekzat óneri, ultymyzdyń rýhanı qazynasy aıtysty nasıhattaý jalǵasa beretinin atap ótti.
