Sıfrlyq jáne Qurylys kodeksteri qaralady

Bıýro otyrysynda M.Áshimbaev Memleket basshysy Qasym-Jomart Toqaev bıylǵy Joldaýynda elimizdi jappaı sıfrlyq elge aınaldyrý jóninde naqty mindetter júktegenin atap ótti. Kózdegen maqsatqa qol jet­kizý úshin barlyq deńgeıdegi depýtattar múddeli taraptarmen, onyń ishinde sarapshylar qaýymdastyǵymen birlesip birqatar zań ázirledi. Olardyń qatarynda – Qazaqstan Respýblıkasynyń Sıfrlyq kodeksi jáne oǵan ilespe «Qazaqstan Respýblıkasynyń keıbir zańnamalyq aktilerine sıfrlandyrý, kólik jáne kásipkerlik máseleleri boıynsha ózgerister men tolyqtyrýlar engizý týraly», sondaı-aq «Qazaqstan Respýblıkasynyń Ákimshilik quqyq buzýshylyq týraly kodeksine ózgeris­ter men tolyqtyrýlar engizý týraly» zańdar bar. Bıýro músheleri atalǵan zańdardy palatanyń aldaǵy otyrysynda qaraý jóninde sheshim qabyldady. Bul qujattar sıfrlyq salany quqyqtyq retteýdiń biryńǵaı jáne ashyq júıesin qurýǵa baǵyttalǵan. Kodeks derekter men sıfrlyq obektilerdi basqarýdyń quqyqtyq negizin qalyptastyrady.

Senat otyrysynyń kún tártibine Qazaqstan Respýblıkasynyń Qurylys kodeksi men oǵan ilespe «Qazaqstan Respýblıkasynyń keıbir zańnamalyq aktilerine sáýlet, qala qurylysy jáne qurylys máseleleri boıynsha ózgeris­ter men tolyqtyrýlar engizý týraly» zań shyǵaryldy. Bul zańnamalyq normalar qala qurylysyna baılanysty sheshimderdi talqylaý kezinde turǵyndar kóptep qatysyp, qoǵamdyq, jeke múddelerdi qozǵaıtyn jobalar boıynsha usynystar bere alady, sondaı-aq zań buzýshylyqtardy jedel aldyn alýdy kózdeıdi.

Sonymen qatar senatorlar aldaǵy beısenbide «Qazaqstan Respýblıkasyndaǵy bankter jáne bank qyzmeti týraly», «Qazaqstan Respýblıkasynyń keıbir zańnamalyq aktilerine qarjy naryǵyn retteý men damytý, baılanys jáne bankrottyq máseleleri boıynsha ózgerister men tolyqtyrýlar engizý týraly» zańdardy qaraıdy. Bıýro otyrysynda atalyp ótkendeı, bankter týraly jańa zań bank júıesiniń qarjylyq turaqtylyǵyn art­tyrýǵa, ulttyq zańnamany halyq­aralyq standarttarǵa sáıkes keltirý­ge yqpal etedi. Qarjy sektorynda básekelestikti damytý, ınnovasııa­lardy yntalandyrý jónindegi sharalar da eskerilmek.

Sondaı-aq «Qazaqstan Respýblıkasynyń Úkimeti men Bilim, ǵylym jáne mádenıet máseleleri jónindegi BUU (IýNESKO) arasyndaǵy Qazaqstanda IýNESKO aıasyndaǵy 2-sanatty ortalyq retinde Ortalyq Azııa óńirlik glıasıologııa ortalyǵy­nyń mártebesin qaıta jalǵastyrý týraly kelisimdi ratıfıkasııalaý týraly» jáne «Qazaqstan Respýblıkasy­nyń Qylmystyq kodeksine, QR Qylmystyq-prosestik kodeksine tolyqtyrýlar engizý týraly» zańdar Senat otyrysynyń kún tártibine shyǵaryldy.

Bıýro otyrysynda depýtattar Májilis qabyldaǵan zańdardy ju­mys úshin palatanyń turaqty komı­tet­terine bólip berdi, sondaı-aq osy aptaǵa arnalǵan is-sharalar josparyn pysyqtady. Bul aptada senatorlar dárilik qaýipsizdikti, dári-dármekterdiń qoljetimdiligin, sapasyn, ımportty almastyrýdy qamtamasyz etýge, sondaı-aq aýyl sharýashylyǵy ónimderin qaıta óńdeý salasyna otandyq, sheteldik ınvestısııalardy tartýǵa qatysty másele­ler men basqa da mańyzdy túıtkilderge toqtalady.