Tekserý nátıjesinde atalǵan azamatshanyń sheteldik esepte turǵan kólik quraldaryna saqtandyrý polısterin zańsyz rásimdeý qyzmetin kórsetkeni anyqtaldy. Atalǵan polıster saqtandyrý jaǵdaıy týyndaǵan kezde zańdy kúshi bolmaǵan.
Sonymen qatar kúdiktiniń kólik quralyn basqarý quqyǵyn beretin ózge de quqyq belgileıtin qujattardy zańsyz daıyndaýmen aınalysqany belgili boldy. Kúdiktiniń avtokóligin tintý kezinde polısııa qyzmetkerleri medısınalyq anyqtamalardy, júrgizýshi kýáligin alý úshin oqý kýrstarynan ótkeni týraly kýálikterdi, sondaı-aq notarıýstyń mór tańbasy qoıylǵan toltyrylmaǵan blankilerdi tárkiledi. Ustalýyna jol-kólik oqıǵasynan keıin júrgizýshilerdiń biriniń saqtandyrý kompanııasyna júginýi sebep bolǵan.
Tekserý barysynda júrgizýshiniń buǵan deıin kúdikti áıelden úsh aı merzimge saqtandyrý polısin rásimdegeni, alaıda saqtandyrý tólemin alý kezinde qujattyń jalǵan ekeni anyqtalǵan.
Atalǵan derek boıynsha jalǵan qujattardy jasaý jáne ótkizý belgilerimen sotqa deıingi tergep-tekserý bastaldy. Qazirgi ýaqytta oqıǵanyń barlyq mán-jaıyn jáne yqtımal sybaılastardy anyqtaýǵa baǵyttalǵan qajetti tergeý áreketteri júrgizilýde.
