Messendjerdi ázirleýshilerdiń aıtýynsha, Reseı bıligi WhatsApp qyzmetin shekteýge kirisken.
«WhatsApp-qa qoljetimdilikti shekteý arqyly Reseı úkimeti 100 mıllıonnan astam adamdy jeke sóılesý quqyǵynan aıyrýǵa tyrysýda. Bul qadam mereke qarsańynda jasalyp otyr», dedi kompanııa ókili halyqaralyq Reuters agenttigine 23 jeltoqsanda.
Onyń aıtýynsha, qosymsha Reseıdiń árbir aımaǵynda adamdardyń kúndelikti ómirine tereń engen: ata-analar chatynan bastap, jumys toptaryna, dostarmen, kórshilermen jáne týystarmen baılanysqa deıin.
«Biz qoldanýshylarymyzdy qorǵaýǵa mindettimiz. Sebebi adamdardy memleket usynǵan, qaýipsizdigi tómen qosymshalardy paıdalanýǵa májbúrleý olardyń jeke qaýipsizdigin álsiretedi», dep qosty ókil.
Reseıde WhatsApp jumysy tamyz aıynan beri júıeli túrde buǵattalyp keledi. Sol kezde-aq kóptegen qoldanýshylar úshin qońyraý shalý múmkindigi jabylǵan edi.
28 qarashada Reseıdiń baılanys salasyn qadaǵalaıtyn organ – Roskomnadzor eger kompanııa reseılik zań talaptaryn oryndamasa, ıaǵnı quqyq qorǵaý organdarymen yntymaqtaspasa, messendjerdi tolyq buǵattaıtynyn eskertti.
22 jeltoqsannan bastap reseılik qoldanýshylar qosymshada aqaýlarǵa shaǵymdandy. RBK derekkózine súıensek, Roskomnadzor WhatsApp jumysyn 70–80% deńgeıinde ádeıi baıaýlatqan.
