Kez kelgen jańalyqty sanaly túrde qabyldaý, taldaý ony durys qoldaný – aqparattyq mádenıetti qalyptastyrýdyń negizgi sharty. Bul daǵdy jeke adamnyń ǵana emes, tutas qoǵamnyń jaýapkershiligin bekite túsedi. «Aqparat tasqynyndaǵy jas urpaq: qundylyq, tańdaý jáne jaýapkershilik» taqyrybynda ótken jıyn barysynda «Qazcontent» AQ basqarma tóraǵasy Aına Zadabek saýattylyqtyń bes negizgi klasterin ashyp túsindirdi.
Medıasarapshynyń aıtýynsha, qazir aqparattyq, emosıonaldy, tehnologııalyq, taım-menedjment, sondaı-aq jasandy ıntellektimen jumys isteý gıgıenasy qajet. Al Májilis depýtaty Ekaterına Smolıakova búgingi jas býyn burynǵy urpaqqa qaraǵanda áldeqaıda saýatty jáne kóptegen múmkindikke ıe ekenin aıtty.
«Prezıdenttik kadrlyq rezerv, «Bolashaq» baǵdarlamasynyń keńeıýi, memlekettik granttar sanynyń jyl saıyn artýy – jastardyń sapaly bilim alýyna jáne qoǵam ómirine belsendi aralasýyna jol ashyp otyrǵan izgi bastamalar. Keıingi eki-úsh jylda elimizge álemniń aldyńǵy qatarly 20-dan asa ýnıversıtetiniń fılıaly kelip, talantty jastardy elde ustap qalýǵa múmkindik týǵyzyp otyr. Májiliste qabyldanyp jatqan jańa zańdar da jastardyń tikeleı qatysýymen ázirlenip jatyr. Máselen, jasandy ıntellekt jáne sıfrlyq kodeks boıynsha jumys toptarynda IT-sarapshylar, jas mamandar, stýdentter de belsendi eńbek etti. Qazir saıasatqa jastardyń kelýi qalypty úrdiske aınalyp keledi. Basshylyq qyzmetter de jasaryp jatyr. Bastysy – adaldyq, bilim jáne eńbekqorlyq. Osy qaǵıdatty ustanǵan jasqa barlyq esik ashyq», dedi E.Smolıakova.
Sóz arasynda depýtat sıfrlandyrý jáne jasandy ıntellektini engizý jónindegi maqsattardy júzege asyrý jastardyń mindeti ekenin atap ótti. Alańda medıakeńistiktegi ózekti trendterge de erekshe nazar aýdaryldy.
Negizinen «JastarX» jobasy 2023 jyldan bastap Mádenıet jáne aqparat mınıstrliginiń qoldaýymen «Jastar» ǵylymı-zertteý ortalyǵynyń bastamasymen júzege asyrylyp keledi. Bıyl joba aıasynda tórt dıalog alańy ótti. Atap aıtsaq, «Jańa býynnyń qundylyqtary», «Jumysshy mamandyqtardyń bolashaǵy: trendter men perspektıvalar», «Eńbek naryǵyndaǵy qazirgi tendensııalar men jaǵdaı», «Sıfrlandyrý jáne jasandy ıntellekt». Bir ereksheligi osy jyly joba jumysyna óńirlik jastar resýrstyq ortalyqtary da qatysyp, talqylaýlarǵa onlaın formatta qatysýǵa múmkindik aldy.
