Is-shara barysynda Máýlen Áshimbaev azamattardyń densaýlyǵyn saqtaý memlekettiń basym baǵyttarynyń biri sanalatynyn jáne osy salada júıeli jumys júrgizilip jatqanyn atap ótti. Ol atalǵan salanyń asa mańyzdy ekenin aıtyp, bul baǵyttyń adam kapıtalyna, áleýmettik turaqtylyqqa, ómir sapasyna jáne eldiń jalpy ekonomıkalyq damýyna tıgizetin áserine nazar aýdardy.
Kezdesýde memleket qabyldaǵan keshendi sharalarǵa qaramastan, barlyq múddeli taraptyń birlesken kúsh-jigerin qajet etetin problemalar bar ekeni sóz boldy. Olardyń qatarynda sozylmaly kúızelis pen táýeldiliktiń saldary, sýısıd, ásirese aýyldyq jerlerdegi maman tapshylyǵy, emdeý men kómek kórsetýdiń eskirgen hattamalary sııaqty máseleler óte ózekti. Mundaı jaǵdaı keıde stıgmatızasııany kúsheıtip, pasıentterdiń densaýlyǵyna qaýip tóndirýi de múmkin.
«Prezıdent Qasym-Jomart Toqaev ult densaýlyǵy eldiń basty baılyǵy ekenin únemi aıtyp keledi. Búginde densaýlyq saqtaý júıesin damytýǵa jáne dárigerlerdi qoldaýǵa qatysty keshendi reformalar júzege asyrylyp jatyr. Degenmen qazir kadr tapshylyǵyna baılanysty densaýlyq saqtaý júıesi psıhologııalyq jáne psıhıatrııalyq kómek salasynda aıtarlyqtaı máseleler bar. Keıingi 20 jylda qabyldanǵan sharalarǵa jáne ólim-jitim deńgeıiniń birtindep tómendeýine qaramastan, ókinishke qaraı, eldegi sýısıd kórsetkishi azaımaı otyr. Dúnıejúzilik densaýlyq saqtaý uıymynyń baǵalaýy boıynsha, Qazaqstanda sýısıdten bolatyn ólim-jitim sany álemdik ortasha kórsetkishterden asyp túsedi. Ásirese jastar arasynda jıi kezdesedi. О́z-ózine qol jumsaý kóbine qumar oıyndar men esirtkige táýeldilikten zardap shegetin adamdarda bolady. Jasyratyny joq, lýdomanııa úlken áleýmettik máselege aınaldy. Osy oraıda halyqtyń qoljetimdi psıhologııalyq ońaltý sharalary týraly habardar bolýyn qamtamasyz etý jáne qoldanystaǵy psıhologııalyq qoldaý sharalarynyń tıimdiligin arttyrý isinde memlekettik organdarǵa erekshe jaýapkershilik júkteledi», dedi Senat tóraǵasy.
M.Áshimbaev atap ótkendeı, qajetti kómek pen emdeýdi durys uıymdastyrý úshin dárigerlik jáne konsýltasııalyq tásilderdi ajyratý asa mańyzdy. Sondaı-aq dıagnostıkanyń naqty júıesi bolýǵa tıis. Qoldaýǵa júginý jaýapsyz qalmaı, der kezinde qajetti sharalar qolǵa alynýy kerek.
Sonymen qatar palata spıkeri Ornyqty damý salasyndaǵy ulttyq maqsattar men mindetterdiń iske asyrylýyna monıtorıng júrgizý jónindegi Parlamenttik komıssııanyń densaýlyq saqtaý baǵytynda júrgizip jatqan jumysyna toqtalyp, Ortalyqtyń qyzmetkerleri men emdelýshilerin aldaǵy merekelermen quttyqtady.
Aıta keteıik, «Qamqorlyq» erte aralasý ortalyǵy 2022 jyly ashyldy. Sodan beri atalǵan nysan 3 aıdan 3 jasqa deıingi psıhonevrologııalyq jáne aqyl-oı kemistigi bar balalarǵa ambýlatorııalyq-emhanalyq ońaltý kómegin kórsetip keledi. Osy ýaqyt ishinde reabılıtolog, nevropatolog, logoped, defektolog, psıholog, emdik deneshynyqtyrý jáne kásiptik terapııa mamandary 514 balaǵa keshendi ońaltý sharalary boıynsha qyzmet kórsetti.
Psıhoáleýmettik ońaltý ortalyǵynda psıhıkalyq jáne minez-qulyq buzylystary bar adamdar úshin 7 emdeý-eńbek sheberhanasy uıymdastyrylǵan. Atap aıtqanda, tigin, qolóner, aǵash ustasy sheberhanalary jáne shaǵyn baspahana men óner stýdııasy bar. Ortalyqta psıhıkalyq aýytqýlary bar, sonyń ishinde aýtızm spektriniń buzylýy, psıho-sóıleý damýynyń keshigýi, gıperbelsendilik jáne zeıin jetispeýshilik belgisi bar balalar úshin kúndizgi stasıonar jumys isteıdi.
