Jyl sońyndaǵy bul taǵylymdy ári áserli mádenı kesh ónersúıer qaýymǵa shattyq syılap qana qoımaı, shyǵarmashylyq tabystarǵa toly jyldy saltanatty túrde qorytyndylaǵan mazmundy kesh boldy. Merekelik konsertte otandyq estradanyń tańdaýly ókilderi sahna tórine shyǵyp, kórermenge joǵary deńgeıdegi mýzykalyq baǵdarlama usyndy. Ánshilerdiń jandy daýysta kásibı bendtiń súıemeldeýimen oryndaǵan týyndylary keshtiń shynaıy rýhyn aıqyndaı tústi. Tanymal hıt ánder men jańa jyldyq klassıkalyq shyǵarmalar zaldaǵy tyńdarmandy bir sátke kúndelikti kúıbeńnen alystatyp, meıramnyń sıqyrly álemine jeteledi.
Konsert baǵdarlamasyna engen «Jańa jyl shamdary», «Appaq qar», «Jańa jyl» syndy otandyq týyndylar kórermenniń ystyq yqylasyna bólense, álemge áıgili «It's the Most Wonderful Time of the Year» men «Jingle Bell Rock» ánderi keshke halyqaralyq merekelik reńk berdi. Árbir mýzykalyq nomer jańa jyldyń úmit pen jańarý kezeńi ekenin aıshyqtaı otyryp, kórermen kóńilinde erekshe áser qaldyrdy.
Mýzykalyq kesh bı ónerimen, sahnalyq qoıylymdarmen jáne zamanaýı vızýaldy sheshimdermen sheber tolyqtyryldy. Sahna tórinde oryndalǵan horeografııalyq kompozısııalar konserttiń kórkemdik deńgeıin arttyryp, án men bıdiń úılesimdi úndestigin kórsetti. Ásem kostıýmder, jaryqtyń áserli qoldanylýy men sahnalyq bezendirý keshtiń kórkin asha tústi.
Bul keshte «Qazaqkonsert» uıymynyń tanymal óner juldyzdarymen qatar «Astana Musical» memlekettik teatry, elimizge keńinen tanymal «GULDER» ansambliniń baleti, sondaı-aq «G-band» toby óner kórsetti. Ár ujym ózine tán stıl men kásibı sheberligin áıgilep, konsert baǵdarlamasyn mazmundyq ári kórkemdik turǵydan baıytty. Bir sahnada toǵysqan túrli janr ókilderi merekelik keshtiń kórkemdik aıasyn keńeıtip, kórermenge shynaıy óner merekesin syılady.
«NEW YEAR with QAZAQCONCERT» konserti kórermenniń uzaq qol soǵýyna ıe bolyp, jańa jyldy ónermen qarsy alýdyń jarqyn úlgisine aınaldy. Bul kesh ótken jylǵa rızashylyq bildirip, aldaǵy jylǵa úmit pen senimmen qadam basýǵa úndegen rýhanı máni tereń mádenı shara retinde este qaldy. Atalǵan konsert «Qazaqkonsert» ujymynyń kásibı deńgeıi men shyǵarmashylyq áleýetin taǵy bir márte dáleldep, elimizdiń mádenı keńistigindegi mańyzdy oqıǵalardyń qataryn tolyqtyrdy.
