Bul qujat Qazaqstan Respýblıkasy Úkimetiniń 2024 jylǵa arnalǵan zań shyǵarý jumysynyń josparyn oryndaý, Memleket basshysynyń 2024 jylǵy 15 naýryzda Ulttyq quryltaıda bergen tapsyrmalaryn iske asyrý maqsatynda, sondaı-aq qoǵam suranysyna baılanysty ázirlendi.
Arhıv isi men qujattamany basqarýdyń qoldanystaǵy júıesin ózgertý – tarıhı-mádenı murany saqtaý jáne jeke derekterdiń qorǵalýyn qamtamasyz etý úshin mańyzdy.
Zań sıfrlyq arhıvti qalyptastyrýda quqyqtyq negizderdi aıqyndaıdy jáne «Qazaqstan Respýblıkasynyń Ulttyq arhıv qory jáne arhıvter týraly» zańynyń qoldanylý aıasyn keńeıtip, qujattardyń saqtalýyn qamtamasyz etý, olardy elektrondyq formatqa kóshirý, Ulttyq arhıv qorynyń quramyn jańa qujat túrlerimen tolyqtyrý, sondaı-aq uǵymdyq apparatty jańartý máselelerin qamtıdy.
Zańda sıfrlyq arhıvte qujattardy júrgizý jáne saqtaýǵa tapsyrý tártibi rettelgen. Sıfrlyq arhıv – elektrondyq arhıvtik qujattar men arhıvtik qujattardyń elektrondyq kóshirmeleriniń jıyntyǵy jáne olar elektrondyq formatta uıymdastyrylyp, saqtalady.
Qazaqstannyń tarıhı-mádenı murasyn saqtaý maqsatynda memlekettik bıýdjet qarajaty esebinen, atap aıtsaq, birlesip qarjylandyrý arqyly jasalǵan jáne tarıhı-mádenı ári ǵylymı qundylyǵy bar aýdıovızýaldyq qujattardyń mindetti danalaryn, jeke jáne zańdy tulǵalardyń memlekettik arhıvterge tapsyrýy jónindegi norma bekitildi.
Qujattaǵy negizgi normalardyń biri – memlekettik arhıvterge «Ulttyq» mártebesin berý. Bul arhıv mekemeleriniń materıaldyq-tehnıkalyq bazasyn nyǵaıtýǵa, olardyń tarıhı-mádenı murany saqtaý júıesindegi bedeli men mańyzyn arttyrýǵa, sondaı-aq arhıv salasy qyzmetkerleriniń jalaqysyn kóterýge múmkindik beredi.
Sonymen qatar atalmysh qujatta balalardyń densaýlyǵy men damýyna zııan keltiretin aqparattan qorǵaý maqsatynda qoǵamdyq keńistikte, buqaralyq aqparat quraldary, telekommýnıkasııa jelileri jáne onlaın-platformalar arqyly pedofılııany jáne dástúrli emes jynystyq baǵdardy nasıhattaıtyn aqparat ornalastyrýdy shekteý normalary kózdelgen.
Neke jáne otbasy ınstıtýtyn nyǵaıtýǵa negizdelgen dástúrli otbasylyq qundylyqtardy dáripteý, balalardy ulttyq jáne otbasylyq qundylyqtardy qurmetteýge baýlyp, rýhanı tárbıe berý – memlekettik saıasattyń basym baǵyttarynyń biri. 2024 jylǵy 6 tamyzda «Qazaqstanda LGBT-ny ashyq jáne jasyryn nasıhattaýǵa qarsymyz!» atty petısııanyń «jasóspirimder men balalardy jynystyq qatynas nasıhatynan qorǵaý» bóligindegi talaptary ishinara oryndaldy. Osyǵan baılanysty birqatar zańnamalyq aktilerge túzetýler engizý qajet boldy.
Nátıjesinde zań arqyly Qazaqstan Respýblıkasynyń Eńbek kodeksine jáne 12 zańyna ózgerister men tolyqtyrýlar engizildi.
Zańda «dástúrli emes seksýaldyq baǵdardy nasıhattaý» jáne «pedofılııany nasıhattaý» uǵymdaryna naqty anyqtamalar berilip, olar zańǵa qaıshy kontentke teńestirildi.
Memleket basshysy bekitken bul zań Ulttyq arhıv qory men Qazaqstannyń tarıhı-mádenı murasyn saqtaýdy, memlekettik arhıvterdiń mártebesin arttyrýdy, sondaı-aq óskeleń urpaqty zańsyz kontentten qorǵaýdy maqsat etedi.
Prezıdent quqyq buzýshylyqqa qatysty birqatar zańǵa qol qoıǵanyn habarlaǵan edik.
