Foto: pixabay.com
Kásipkerler praktıkalyq túsindirmeler alady
«Halyq býhgalteri» — jeke kásipkerler men shaǵyn bıznes sýbektilerine arnalǵan tegin konsýltasııalyq kómek.
Kásipkerler býhgalterlik esep, salyqtyq eseptilik jáne aqparattyq júıelermen jumys isteý máseleleri boıynsha túsinikti ári praktıkalyq túsindirmeler ala alady.
Negizgi format – oflaın
Negizgi format qalalar men oblys ortalyqtaryndaǵy memlekettik kirister basqarmalary bazasynda oflaın qabyldaý túrinde bolady.
2026 jylǵy qańtar-aqpan aılarynda konsýltasııalar aptasyna 3 ret (dúısenbi, sársenbi, juma) saǵat 10:00-den 13:00-ge deıin ótkiziledi.
2026 jylǵy naýryzdan bastap konsýltasııalar aptasyna 2 ret júrgiziledi.
Konsýltasııalardy eń tájirıbeli mamandar júrgizedi
Qabyldaý oryndary jumys kestesi men mekenjaıy kórsetilgen «Halyq býhgalteri» atty arnaıy mańdaıshalarmen belgilenetin bolady.
Aksııa sheńberinde konsýltasııalardy kásibı býhgalterler men aýdıtorlar, kásibı býhgalterlik birlestikterdiń ókilderi, sondaı-aq zańnama normalaryn túsindirý úshin memlekettik kirister organdarynyń eń tájirıbeli qyzmetkerleri júrgizedi.
Kásipkerler úshin taǵy qandaı múmkindikter qoljetimdi?
Astana, Almaty, Shymkent qalalarynda konsýltasııalar ótkizý úshin jeke oryndar belgileý josparlanyp otyr. О́ńirlerde konsýltasııalar aýdandyq deńgeıde, qajet bolǵan jaǵdaıda mamandardyń barýymen uıymdastyrylady.
Sondaı-aq qabyldaý ýaqytynda aýdandyq jáne qalalyq basqarmalar arasynda beınebaılanys pen telefon arqyly keńes berý múmkindigi kózdelgen.
Betpe-bet konsýltasııalardan bólek, kásipkerler úshin kelesi múmkindikter qoljetimdi bolady:
- resmı resýrstar arqyly onlaın-konsýltasııalar;
- vebınarlar (onlaın jáne oflaın formatta);
- esepti kezeńderde taqyryptyq konsýltasııalyq sessııalar.
Aqparattar jańartylyp, tolyqtyrylady
Memlekettik kirister komıteti zańnama normalaryn qarapaıym tilmen túsindiretin jáne aqparattyq júıelerde jumys isteý boıynsha qadamdyq nusqaýlyqtary bar negizgi taqyryptar boıynsha býkletter daıyndaıdy.
Sonymen qatar Call-ortalyqqa arnalǵan materıaldar jańartylyp, SalykBot Telegram-arnasy aqparatpen tolyqtyrylady.
«Halyq býhgalteri» aksııasy salyq tóleýshilermen jumys isteýde baqylaý modelinen servıstik súıemeldeýge kóshý jolyndaǵy alǵashqy qadam bolmaq. Aldaǵy ýaqytta quqyq buzýshylyqtardyń aldyn alýǵa jáne konsýltasııalyq qoldaýdyń sapasyn arttyrýǵa baǵyttalǵan qosymsha sharalardy iske asyrý josparlanyp jatyr.
Aksııanyń bastalatyny týraly 23 jeltoqsanda Úkimet otyrysynda málimdelgen edi.
